Nguyen er algengasta ættarnafnið á Íslandi. Blöndal algengast af hefðbundnum íslenskum ættarnöfnum.

Þetta kemur fram í svari dómsmálaráðherra við fyrirspurn Jóns Gnarr þingmanns Viðreisnar um ættarnöfn. Jón spurði um sundurliðaða lista íslenskra og erlendra nafna en Þjóðskrá heldur ekki utan um hvort nafn sé íslenskt eða erlent.

„Samkvæmt upplýsingum frá Þjóðskrá Íslands er umrædd vinnsla ekki fullkomlega nákvæm þar sem ekki er unnt að taka einungis ættarnöfn úr grunni þjóðskrár. Grunnurinn er settur saman úr ættarnöfnum og kenninöfnum sem taka til kenningar til foreldra. Þó má ætla að listinn sé nokkuð nákvæmur,“ segir í svarinu.

Eins og sést á listanum þá er Blöndal algengast af hefðbundnum íslenskum ættarnöfnum. 472 bera það nafn.

Á meðal annarra algengra íslenskra nafna má nefna Hansen, Thorarensen, Thoroddsen og Bergmann.

Langflestir, 615, bera ættarnafnið Nguyen sem er víetnamskt. Dönsk nöfn eins og Andersen, Olsen og Jensen eru algeng. Sem og nöfn af spænskum uppruna á borð við Rodriguez, Garcia, Perez og Gonzalez. Þrátt fyrir mikinn fjölda pólskra innflytjenda komast fá nöfn á blað. Þó má sjá Nowak og Kowalczyk á listanum.