Rósu Guðbjartsdóttur bæjarstjóra Hafnarfjarðar var fyrr í dag afhentur undirskriftalisti vegna mótmæla íbúa gegn áformum fyrirtækisins Carbfix um stórtæka dælingu koltvísýrings í jörðu við Straumsvík en áformin hafa reynst afar umdeild. Með undirskriftalistanum er þess krafist að efnt verði til kosninga meðal íbúa Hafnarfjarðar um hvort leyfa eigi áformin falli bæjarstjórn ekki frá þeim.

Í fréttatilkynningu vegna afhendingarinnar segir að 6.090 manns hafi ritað nafn sitt á listann en ábyrgðarmaður undirskriftasöfnunarinnar var Ragnar Þór Reynisson.

Enn fremur segir að skorað sé með undirskriftunum á bæjarstjórn Hafnarfjarðarbæjar að falla frá áformum um verkefnið sem kallast Coda Terminal eða setja það í íbúakosningu. Í tilkynningunni segir einnig:

„Þetta risastóra verkefni á sér engar hliðstæður á Íslandi né í heiminum öllum og mikið um óvissuþætti sem tengjast verkefninu vegna áhrifa þess á umhverfi og íbúa bæjarins. Fyrirhugað er að dæla niður og binda í berg í mikilli nálægð við íbúðarbyggð við Vellina í Hafnarfirði, 3 milljónir tonna á ári af innfluttu koldíoxíð frá verksmiðjum í Evrópu. Íbúar hvetja bæjarstjórn Hafnarfjarðar til að virða íbúalýðræðið og setja verkefnið í heild sinni í íbúakosningu.“

Undir fréttatilkynninguna rita áðurnefndur Ragnar og Arndís Kjartansdóttir, einnig íbúi í Hafnarfirði