Í tilkynningu frá Reykjavíkurborg kemur fram að breytingar verði gerðar „innan tíðar“ á gjaldskyldu bílastæða. Einkum sé um að ræða stækkun á gjaldsvæði 2 en talningar frá því árslok 2023 sýni mikla og stöðuga nýtingu bílastæða á jöðrum núverandi gjaldsvæða. Áður en farið verði að innheimta gjald í samræmi við tillöguna verði komið upp viðeigandi merkingum og greiðslubúnaði þar sem þörf sé á. Breytingarnar verði kynntar vel áður en gjaldskylda verður tekin upp.
Breytingarnar hafi verið samþykktar á fundi umhverfis og skipulagsráðs Reykjavíkurborgar í morgun.
Í tilkynningunni segir enn fremur að einnig verði stækkun á gjaldsvæði 1 við Háskóla Íslands. Stækkun gjaldssvæða við Háskólann komi til vegna þess að almenn gjaldtaka hefjist á bílastæðum við skólann í haust.
Þær götur þar sem gjaldskylda verður tekin upp á bílastæðum eru eftirfarandi:
Sturlugata
Aragata
Egilsgata, bílaplan við Hallgrímskirkju
Eiríksgata, bílaplan við Hallgrímskirkju
Oddagata
Seljavegur
Sæmundargata
Vesturgata milli Ánanausta og Stýrimannastígs
Í tilkynningunni er einnig tekið fram að minnt sé á að íbúar á gjaldskyldum svæðum eða í næsta nágrenni þeirra (búsettir innan íbúakortasvæða) geti sótt um íbúakort að uppfylltum vissum skilyrðum. Íbúakort gefi handhafa þess heimild til þess að leggja bifreið sinni án endurgjalds á gjaldskyldu svæði innan gildissvæðis korts síns.
