Réttarhöldin yfir hinum þýska Christian Brückner vegna fjölda kynferðisbrota í Portúgal á margra ára tímabili halda áfram. Kona lýsti því hvernig hann braut gegn sér þegar hún var 10 ára gömul, aðeins nokkrum vikum áður en hin breska Madeleine McCann hvarf af hótelherbergi í næsta bæ. Brückner er einnig grunaður um brottnám og morð hennar.
Breska blaðið Mirror greinir frá þessu.
Konan, sem er þýsk og 27 ára gömul í dag, lýsti reynslu sinni fyrir dómurum í borginni Braunschweig þar sem réttarhöldin fara fram. Að sögn hennar braut Brückner gegn henni í ferðamannabænum Salema, vestan við Algarve. McCann hvarf í bænum Praia da Luz, sem liggur við Salema.
Lýsti konan því hvernig Brückner hafi beðið aftan við klett, nakinn, og stokkið á hana. Þá hafi Brückner spurt hvað hún héti, gripið í hana, sagt henni að „horfa hér“, það er á kynfærin á sér, og síðan fróað sér á meðan hann horfði glottandi á stúlkuna.
Foreldrar stúlkunnar voru ekki langt frá, aðeins nokkrum metrum. En þau tóku samt ekki eftir því hvað var að gerast.
Konan brast í grát þegar hún lýsti atvikinu fyrir réttinum. En nafn hennar er ekki gefið upp.
„Maðurinn kom, klifraði niður af kletti, spurði hvað ég væri kölluð. Ég sagði honum hvað ég heiti og þá greip hann um höndina á mér,“ sagði konan í vitnastúkunni.
Maðurinn komst undan en fjölskyldan fór með stúlkuna til lögreglunnar þar sem teiknuð var upp mynd eftir lýsingu hennar.
Löngu seinna, árið 2019, hafði lögreglan samband við konuna og lét hana vita að maðurinn gæti verið fundinn. Voru henni sýndar myndir af sex eða sjö mönnum og benti hún á mynd af Brückner, en það var einmitt maðurinn sem lögreglunni grunaði að hefði brotið á henni.
Konan sagði réttinum að upphaflega hafi hún aðeins verið um 50 prósent viss að þetta væri rétti maðurinn. En eftir að hafa gert sína eigin athugun á málinu sé hún sannfærð um að hann sé gerandinn. Meðal annars vegna þess að hún hafi munað eftir áberandi fæðingarblettum á baki og á lærinu á honum. Fram hefur komið í réttarskjölum að Brückner hafi látið fjarlægja af sér fæðingarbletti á lærinu þegar hann var sakaður um nauðgun.
„Ég man eftir nokkrum stórum fæðingarblettum sem voru dreifðir um líkamann, á bakinu og á lærinu. Dreifðir, ekki á einum stað heldur marga á bakinu á honum….það voru aðeins fæðingarblettirnir sem ég tók eftir, og glottið á honum,“ sagði konan.
Lögmenn Brückner gagnrýndu vitnisburðinn og sögðu að konan væri að rugla saman eigin minningum og rannsókn sinni. Einnig gagnrýndu þeir lögregluna fyrir að hafa sýnt henni mynd af Brückner.
Réttarhöldin yfir Brückner eru gríðarlega umfangsmikil og mun ekki ljúka fyrr en í haust. Hann er ákærður fyrir nauðganir og kynferðisbrot gegn nokkrum konum og stúlkum á aldrinum 10 til 80 ára. Brotin voru öll framin í Portúgal á árunum 2000 til 2017.
Mál Madeleine McCann er ekki hluti af þessum réttarhöldum en þýska lögreglan er enn þá að rannsaka það mál. Brückner situr nú þegar inni fyrir nauðgun á bandarískri ferðakonu á ellilífeyrisaldri árið 2005. Hann hefur einnig hlotið dóma fyrir misnotkun á börnum.
