Ólafur F. Magnússon, læknir og fyrrverandi borgarstjóri, skrifar heilræði handa Einari Þorsteinssyni sem tók við af Degi B. Eggertssyni sem borgarstjóri um miðjan janúarmánuð.

Ólafur var borgarstjóri um skamma hríð árið 2008 og var borgarfulltrúi lengi vel.

Hann skrifar grein í Morgunblaðið þar sem hann óskar Einari velgengni í starfi en hvetur hann til að huga að nokkrum atriðum meðan hann gegnir þessu mikilvæga starfi.

„Ein­ar Þor­steins­son hef­ur nú í árs­byrj­un 2024 tekið við embætti borg­ar­stjóra í Reykja­vík. Hann er 45 ára að aldri, stjórn­mála­fræðing­ur að mennt og landsþekkt­ur fjöl­miðlamaður. Hann hef­ur nú verið borg­ar­full­trúi í Reykja­vík og formaður borg­ar­ráðs í 18 mánuði,“ segir Ólafur í grein sinni og heldur áfram:

„Í ljósi fram­an­skráðs vil ég koma á fram­færi við nýj­an borg­ar­stjóra góðum ósk­um vegna hins nýja og ábyrgðar­mikla starfs hans og heil­ræðum sem ég tel að skipti meg­in­máli. Flýt­ing Sunda­braut­ar og ör­yggi Reykja­vík­ur­flug­vall­ar eru þar efst á blaði,“ segir hann.

Ólafur segir að Sundabraut eigi að vera á brú en ekki í göngum eins og sumir hafa kallað eftir. „Mik­il­vægt er einnig að greiða fyr­ir um­ferð í borg­inni og að láta al­menn­ings­sam­göng­ur og einka­bílaum­ferð vinna sam­an en ekki hvort gegn öðru,“ segir hann.

Hann gerir Reykjavíkurflugvöll svo að umtalsefni í grein sinni.

„Varðandi ör­yggi Reykja­vík­ur­flug­vall­ar þarf nú þegar að hefjast handa við skóg­ar­högg á há­vöxn­um greni­skógi í Öskju­hlíð sem ógn­ar lend­ingu og flug­taki á A/​V-braut vall­ar­ins. Fresta ber og end­ur­skoða stór­karla­leg­ar bygg­inga­fram­kvæmd­ir og land­fyll­ing­ar í svo­nefnd­um „Nýja Skerjaf­irði“. Ekki má held­ur van­meta hætt­una sem staf­ar af ein­hvers kon­ar borg­ar­línu- og göngu­brú yfir Skerja­fjörð, vegna bygg­ingakr­ana og stór­tækra vinnu­véla við enda suðurbrautar vall­ar­ins, sem munu ógna flu­gör­yggi þannig að jafn­vel þurfi að loka N/​S-braut­inni á meðan þess­ar allt annað en brýnu fram­kvæmd­ir standa yfir,“ segir hann.

Hann endar skrif sín á þessum orðum.

„Ég bið þig, borg­ar­stjóri, að taka þess­ar ábend­ing­ar mín­ar til skoðunar, en þær eru sett­ar fram af heil­ind­um og mót­ast mjög af bak­grunni mín­um sem heim­il­is­lækn­ir í borg­inni og héraðslækn­ir í dreif­býli um ára­tuga­skeið. Mik­il­vægt er að þér gangi vel í starfi. Það eru al­manna­hags­mun­ir.“