Bæjarráð Kópavogs samþykkti í síðustu viku og vísaði til staðfestingar bæjarstjórnar beiðni fjármálasviðs bæjarins um sölu á íbúð í bænum. Íbúðin er í eigu bæjarins en í beiðninni, sem fylgir með fundargerð fundarins, kemur fram ítarleg lýsing á ástandi íbúðarinnar en ljóst er að nýr eigandi mun þurfa að ráðast í kostnaðarsamt viðhald á henni, geri bærinn það ekki áður en íbúðin verður seld.
Íbúðin er í fjölbýlishúsi við Ástún. Hún er 78 fermetrar og fasteignamat hennar á komandi ári er 56,45 milljónir króna. Í húsinu eru alls 18 íbúðir, bærinn á átta þeirra en ein þeirra hefur verið auglýst til sölu og samþykki bæjarstjórn umrædda beiðni mun önnur bætast við.
Í beiðni um heimild til sölunnar kemur fram að húsfélag hússins hafi ekki sinnt viðhaldi á húsinu að utanverðu nægilega vel og því megi búast við talsverðum uppsöfnuðum viðhaldskostnaði í framtíðinni. Fram kemur að það sé mat eignadeildar bæjarins að hag hans sé best borgið með því að selja umrædda íbúð við Ástún. Í beiðninni er vísað til þess að á árinu hafi bærinn gengið frá kaupum á 5 íbúðum og búið sé að samþykkja kauptilboð á einni íbúð til viðbótar. Einnig sé búið að klára uppgjör á stofnframlögum til Brynju leigufélags vegna kaupa á fjórum íbúðum og til Þroskahjálpar vegna kaupa á tveimur íbúðum.
Er því væntanlega markmiðið með sölu á íbúðinni við Ástún að vega upp á móti íbúðakaupum og stofnframlögum bæjarins á þessu ári.
Í beiðninni um sölu íbúðarinnar segir að við söluna yrði fengin ástandsskýrsla sem muni fylgja eigninni.
Með sölubeiðninni fylgir stutt samantekt frá umhverfissviði bæjarins um ástand íbúðarinnar. Samkvæmt samantektinni er íbúðin í slæmu ásigkomulagi og nauðsynlegt viðhald verður kostnaðarsamt.
Í samantektinni er lagt til að íbúðin verði seld í því ástandi sem henni var skilað. Efast er um að bærinn fengi hærra verð fyrir íbúðina þótt ráðist yrði í að tjöruhreinsa hana og mála.
Fram kemur að allt gler í íbúðinni sé ónýtt. Skipta þurfi út öllum miðstöðvarofnum. Hurðir séu í lélegu ástandi. Vatn hafi komist undir parket í að minnsta kosti einu herbergi og vegna mikilla reykinga í íbúðinni þurfi að skipta út fataskápum og eldhúsinnréttingu. Fataskáparnir hafi verið málaðir 2016. Skipta þurfi einnig út blöndunatækjum á baðherbergi.
Gert er ráð fyrir í samantektinni að kostnaður við að standsetja íbúðina verði í kringum 9 milljónir króna. Í lok samantektarinnar koma enn fremur fram áhyggjur af ástandi hússins í heild. Fara þurfi út í mikinnn kostnað á vegum húsfélagsins á komandi árum ef húsið eigi hreinlega ekki að eyðileggjast.
