Landsréttur sakfelldi á fimmtudag Finn Inga Einarsson fyrir nauðgun en Héraðsdómur Reykjavíkur hafði áður sýknað hann.

Ákært var vegna atviks sem átti sér stað á árshátíð fyrirtækis árið 2022, inni á salerni. Finnur Ingi var þar að skemmta sér sem maki en kona hans starfaði í viðkomandi fyrirtæki. Hann var sakaður um að hafa stungið getnaðarlimi sínum í munn konu er hún sat á salerninu. Var hann sagður hafa nýtt sér ölvunarástand konunnar svo hún gat ekki spornað gegn verknaðinum. Hún kúgaðist og kastaði upp vegna þessarar háttsemi hans.

Finnur Ingi neitaði sök. Héraðsdómur taldi sök ekki fullsannaða en Landsréttur var á öðru máli. Mat Landsréttur framburð hans í málinu ótrúverðugan og að misræmi væri í honum, en í fyrstu skýrslutöku hjá lögreglu sagðist hann ekki vita hver konan væri en í seinni skýrslutökunni sagðist hann hafa séð hana inni á salerni þar sem hún hafi sagst þurfa að kasta upp.

Finnur Ingi var handtekinn nóttina sem atvikið átti sér stað en við rannsókn fundust lífsýni úr konunni á getnaðarlim og nærbuxum hans. Hann gaf þá skýringu á þessu að um snertismit hefði verið að ræða þar sem hann hefði snert höku konunnar og snert lim sinn stuttu síðar er hann pissaði. Landsréttur keypti ekki þessa skýringu.

Landsréttur segir Finn Inga hafa brotið gróflega gegn kynfrelsi konunnar og nýtt sér varnarleysi hennar. Var hann fundinn sekur um nauðgun og dæmdur í tveggja og hálfs árs fangelsi. Einnig var hann dæmdur til að greiða konunni tvær og hálfa milljón króna í miskabætur.