Oleksandr Kovalenko, hernaðarsérfræðingur hjá hugveitunni Information Resistance, sagði í samtali við Danska ríkisútvarpið að norðurkóresku hermönnunum sé ætlað að mæta skorti Rússa á hermönnum. Í fyrstu í Kúrsk en síðan á vígstöðvunum við Pokrovsk í austurhluta Úkraínu.
„Þetta er líklega bara fyrsta bylgjan. Þær geta orðið fleiri. Pútín vill hafa nægan mannafla til að geta haldið áfram linnulausum árásum,“ sagði hann.
Vladímír Pútín, Rússlandsforseti, hefur ekki staðfest beint að norðurkóreskir hermenn séu komnir til Rússlands en á fréttamannafundi í síðustu viku sagðist hann aldrei hafa efast um að Norður-Kórea muni standa við hernaðarsamning ríkjanna en í honum er meðal annars kveðið á um að ríkin muni koma hvort öðru til aðstoðar ef ráðist er inn í þau.
Kovalenko sagðist telja að Norður-Kórea hefði sent hermenn ef Rússar hefðu beðið um það og hefði þá engu skipt hvort ráðist hefði verið inn í Rússland. Hann benti á að á síðasta ári hafi Norður-Kórea tekið við forystusætinu af Íran sem það ríki sem sér Rússlandi fyrir mestu af vopnum.
Hann sagðist ekki telja að norðurkóresku hermennirnir séu mikil ógn né að þeir geti breytt gangi mála í stríðinu en það skipti auðvitað máli hversu margir þeir verða.
„Ef það kemur önnur, þriðja og fjórða bylgja af norðurkóreskum hermönnum, þá erum við að tala um 40.000 til 50.000 hermenn og það myndi skipta verulegu máli við víglínurnar, hugsanlega gera Rússum kleift að brjótast í gegn sums staðar eða jafnvel hrun hjá úkraínska hernum. Við verðum að vera undir það búin,“ sagði hann.
