Í Lögbirtingablaðinu í dag er birt tilkynning um stefnu vegna máls sem maður á níræðisaldri hefur höfðað gegn fyrrverandi eiginkonu sinni og syni þeirra til vefengingar á faðerninu.

Eiginkonan fyrrverandi er einnig á níræðisaldri og er eins og maðurinn búsett á höfuðborgarsvæðinu en sonur þeirra sem er á sextugsaldri býr erlendis.

Í stefnunni segir að maðurinn geri þá kröfu að viðurkennt verði fyrir dómi að hann sé ekki faðir mannsins sem skráður er sem sonur hans.

Enn fremur segir að konan hafi fætt soninn á meðan hún og maðurinn voru enn gift en að maðurinn hafi frá upphafi „af ýmsum ástæðum“ efast um að hann væri faðir sonarins. Maðurinn hafi tjáð syninum og móður hans að hann hafi viljað að gerð yrði mannerfðafræðileg rannsókn til að skera úr um faðernið en að hvorugt þeirra hafi viljað liðka fyrir því að slík rannsókn gæti farið fram.

Í stefnunni kemur fram að maðurinn byggi kröfur sínar á því að sem skráður faðir sonarins eigi hann lögvarinn og óskilyrtan rétt á að krefjast mannerfðafræðilegrar rannsóknar til að fá úr því skorið hvort hann sé faðir sonarins eða ekki. Maðurinn hafi frá fæðingu sonarins haft efasemdir, sem hann telji réttmætar, um að hann sé faðirinn og hvorki sonurinn né móðirin hafi viljað aðstoða við að taka af allan vafa um þau efni. Þá telji maðurinn þá einörðu afstöðu mæðginanna að neita með öllu að taka þátt í mannerfðafræðilegri rannsókn, til að skera úr um hvort hann sé faðirinn, benda til að efasemdir hans séu réttmætar.

Með málshöfðuninni krefst maðurinn þess að gerð verði mannerfðafræðileg rannsókn á lífsýnum úr honum sjálfum, fyrrverandi eiginkonu hans og manninum sem skráður er sem sonur hans.

Málið verður þingfest fyrir Héraðsdómi Reykjaness í næsta mánuði.