Efling stéttarfélag stendur í kvöld fyrir aðgerðum við veitingahúsið Ítalíu á Frakkastíg. Tilefnið, samkvæmt tilkynningu frá Eflingu, eru sögð ítrekuð og endurtekin brot veitingamannsins Elvars Ingimarssonar, eiganda og rekstraraðila Ítalíu, gegn starfsfólki veitingastaðarins. Segir í tilkynningunni að því fer fjarri að um sé að ræða einu brotin sem Elvar hefur gerst sekur um. Eftir hann sé sviðin jörð sambærilegra brota á fleiri veitingahúsum í rekstri Elvars á síðustu árum og hafi fjöldi félaga í Eflingu orðið fyrir barðinu á þeim.
Auk veitingahússins Ítalíu rekur Elvar, ásamt viðskiptafélaga sínum Björgvini Narfa Ásgeirssyni, veitingastaðinn Geitina í Garðabæ.
Í tilkynningu segir að hátt í fjörutíu Eflingarfélagar hafa leitað til stéttarfélagsins vegna aðskilinna kjarasamningsbrota og launaþjófnaðar á veitingahúsum í rekstri Elvars Ingimarssonar. Fullyrt er að ítrekað hafi starfsmenn verið hlunnfarnir varðandi launagreiðslur, bæði hvað við kemur launum vegna yfirvinnu, vinnu á rauðum dögum og dagvinnu. Sömuleiðis eru dæmi um að starfsmenn hafi fengið greidd laun undir taxta. Iðulega hafa laun verið greidd of seint, aðeins að hluta eða alls ekki.
Eflingarfélaginn Vitalii Shybka starfaði á veitingahúsinu Ítalíu. Hann lýsir því að hafa þurft að slá lán hjá vinum til að greiða leigu og kaupa nauðþurftir, vegna þess að laun hans voru ekki greidd. „Þetta hafði allt mjög vond áhrif á líf mitt. Vegna þessara fjárhagsvandræða komu brestir í samband mitt við kærustu mína sem ollu því að endingu að sambandinu lauk. Ég fann ekki aðra vinnu um töluvert langan tíma sökum þess að ég varð þunglyndur og neyddist til að sækja mér aðstoð fagfólks.“
Alla jafna eru ekki gerðir skriflegir ráðningarsamningar við fólk sem hefur störf á veitingahúsum sem Elvar Ingimarsson rekur, starfsmenn fá sjaldan eða ekki afhenta launaseðla eða tímaskráningar. Ítrekuð vanskil hafa verið á greiðslum iðgjalda til stéttarfélagsins og dæmi eru um að ekki hafi verið staðin skil á staðgreiðslu af launum Eflingarfélaga, eða gengið hafi verið gegn óskum þeirra um nýtingu persónuafsláttar. Þannig sat Eflingarfélaginn Erik Krištovčo uppi með ríflega hálfrar milljóna króna skattaskuld þegar hann lét af störfum á veitingastaðnum Il Antico vegna þessarar framgöngu.
Tugir mála eru til meðferðar hjá vinnuréttarsviði Eflingar á hendur félögum Elvars Ingimarssonar og sjö hafa verið send áfram til lögfræðiþjónustu. Elstu málin sem komið hafa inn á borð stéttarfélagsins eru frá því í ágúst 2022 og hafa Eflingarfélagar leitað til vinnuréttarsviðs fram á þennan dag vegna sambærilegra brota.
Fyrrverandi starfsmenn veitingahúsa í rekstri Elvars Ingimarssonar, auk stjórnar og trúnaðarráðs Eflingar stéttarfélags og annarra Eflingarfélaga, munu í kvöld vekja athygli gesta veitingahússins Ítalíu á þessu framferði eiganda og rekstraraðila staðarins. Það munu þau gera með því að taka upp mótmælastöðu fyrir framan veitingahúsið á Frakkastíg, dreifa þar dreifimiðum með upplýsingum um framferði rekstraraðilans og ræða við gesti.
Segir í tilkynningunni að með því að borða á veitingahúsinu Ítalíu sé ýtt undir kjarasamningsbrot, launaþjófnað og misnotkun vinnuafls.
