Eldri hjón slösuðust þegar bifreið þeirra féll á hliðina ofan í holu á miðjum vegi í Seoul, höfuðborg Suður Kóreu. Sækja þurfti bílinn með stórtækum vinnuvélum upp úr götunni.

76 ár gömul kona fór í hjartastopp þegar bíll hennar valt skyndilega á hliðina og féll ofan í holu sem myndaðist á miðjum vegi. Konan var endurlífguð og flutt á spítala. 82 ára gamall eiginmaður hennar slasaðist líka í þessu stórundarlega slysi sem átti sér stað í Seodaemun hverfinu í vesturhluta Seoul, fimmtudaginn 29. ágúst.

Kóreyska blaðið JoongAng Daily greinir frá þessu.

Ekki er vitað hversu alvarleg meiðsli eiginmaðurinn hlaut og heldur ekki hvers vegna þetta gerðist. Einhverjar jarðhræringar hafa orðið svo að hola myndaðist undir malbikinu. Rannsókn er hafin á tildrögum slyssins.

Myndbönd voru birt eftir slysið sem sýna Ssangyong Tivoli bíl hjónanna liggja á annarri hliðinni ofan í holunni og starfsmenn verktakafyrirtækis að reyna að ná honum upp úr.

Ekki er langt síðan að indversk kona féll ofan í sprungu sem opnaðist undir gangstétt í Kuala Lumpur, höfuðborg Malasíu. Leit hefur verið hætt og talið að konan hafi fallið í neðanjarðar fljót og borist með því langt í burtu.