Stúlka fór í hjartastopp eftir hnífstunguárás á menningarnótt. Var hún endurlífguð á staðnum.

Mbl.is greinir frá þessu.

Hjúkrunarfræðingurinn Ryan Corcuera, sem starfar á taugadeild Landspítala, átti leið fram hjá vettvangi árásarinnar, við Skúlagötu í miðborg Reykjavíkur í gærkvöldi. En þrjú ungmenni voru stungin og voru færð á bráðamóttöku Landspítalans.

Í samtali við mbl.is segist Ryan hafa séð stúlkuna, sem var á aldrinum 16 til 18 ára, liggjandi í blóði sínu á götunni. Allir hafi verið í sjokki, sumir öskrandi. Einn af þeim líklegast kærasti hennar. Nokkuð af fólki stóð í kringum stúlkuna þegar Ryan kom að og kom stúlkunni til hjálpar.

„Eft­ir nokkr­ar sek­únd­ur fór hún í hjarta­stopp,“ sagði Ryan. Hún hafi verið föl og ekki geta opnað augun. „Það þurfti bara að hefja end­ur­lífg­un strax.“

Með endurlífgunaraðferðum tókst honum að endurlífga stúlkuna á tveimur eða þremur mínútum. Nokkrum mínútum eftir það mætti sjúkrabíll á staðinn. Var hún flutt á slysadeild og í aðgerð. Hún var í lífshættu.

Greint er frá því að Ryan, sem er upprunalega frá Filippseyjum, sé í áfalli eftir þetta. Hann sagðist vona að stúlkan væri á batavegi og óskar fjölskyldu hennar góðs.