Heru Björk tókst ekki að komast áfram upp úr undankeppni Eurovision í Stokkhólmi í kvöld. Hera flutti þar lagið Scared of Heights sem ekki hlaut náð fyrir augum áhorfenda sem tóku átt í símakosningunni. Hera tekur því ekki þátt í aðalkeppninni sem háð verður á laugardaginn.
Alls fóru tíu lög áfram í aðalkeppnina í kvöld, frá eftirtöldum löndum:
Serbía
Portúgal
Slóvenía
Úkraína
Litháen
Finnland
Kýpur
Króatía
Írland
Lúxemborg
Fimm lönd sitja eftir, þar á meðal Ísland.
Ekki virtist mikill áhugi vera fyrir keppninni hjá Íslendingum að þessu sinni ef marka má fremur litla umræðu um hana á samfélagsmiðlum í kvöld. Afar margir eru ósáttir við þátttöku Ísraels í keppninni vegna hernaðar Ísraelsmanna á Gasa-ströndinni og gífurlegt mannfall almennra borgara þar, þar á meðal fjölda barna. Höfðu margir lýst sig andsnúna þátttöku Íslands í keppninni.
Þess má geta að staða lags Heru í veðbönkum fyrir keppnina var slæm og fór dagversnandi. Kom niðurstaðan því ekki á óvart.