Vinstrisinnaðir hryðjuverkamenn sem nefna sig eftir íslenskum eldfjöllum réðust á verksmiðju Tesla í Berlín í vikunni. Hópurinn segist vilja valda sem mestu raski í samfélaginu.
Á þriðjudag var kveikt var í tengivirki sem veitir verksmiðju Tesla í útjaðri Berlínarborgar rafmagn. Framleiðslan stöðvaðist og ekki er búist við því að hún fari aftur í gang fyrr en í næstu viku.
Ábyrgð á verknaðinum lýsti hópur sem kallar sig Vulkangruppe Tesla Abchalte, eða Vúlkanhópurinn um lokun Tesla. Er þetta einn af nokkrum hópum vúlkanista sem sprottið hafa upp í Þýskalandi á undanförnum árum.
Í yfirlýsingunni var sagt að takmarkið væri að stöðva framleiðslu í hinni risastóru verksmiðju vegna umhverfislegra og vinnumarkaðslegra ástæðna. Verið væri að fara illa með starfsfólk í verksmiðjunni og spilla grunnvatni.
„Við skemmdum fyrir Tesla í dag. Verksmiðju sem étur upp auðlindir jarðar og fólk, spýtir út 6 þúsund stórum bílum, drápsvélum og risatrukkum á hverri viku,“ segir í yfirlýsingunni.
Í frétt Reuters um málið kemur fram að ekki sé búist við því að geta hafið framleiðslu aftur fyrr en í fyrsta lagi snemma í næstu viku. Tap Tesla hlaupi á mörg hundruð milljónum evra, það er mörgum tugum milljarða íslenskra króna.
Elon Musk, stjórnarformaður Tesla, tjáði sig um málið á samfélagsmiðli sínum X. „Þetta eru heimskustu umhverfis hryðjuverkamenn jarðar,“ sagði hann og átti við að þeir væru að beina spjótum sínum að framleiðslu rafmagnsbíla.
Ásakanir vúlkanista um spillingu grunnvatns eru ekki byggðar á sandi. Verksmiðjan opnaði árið 2022 og stendur vilji Tesla til þess að stækka hana. Borgaryfirvöld hafa hins vegar verið hikandi að gera það sökum þess að vatnsverndarsvæði borgarhlutans Brandenburg yrði ógnað. Þegar hafa vatnsbirgðirnar verið skertar vegna þurrka á undanförnum árum.
Hópar vúlkanista hafa verið starfræktir í meira en tíu ár. Kalla meðlimirnir sig eftir þekktum eldfjöllum, þar af mjög mörgum á Íslandi. Meðal annars Grímsvötn, Katla og Ok.
Þetta er ekki í fyrsta skiptið sem vúlkanistar ráðast gegn verksmiðju Tesla. Kveikt var í sams konar tengivirkjum árið 2021 þegar verksmiðjan var í byggingu.
Ekki er vitað hversu skipulagðir hóparnir eða miðstýrðir hóparnir eru. Eða þá hversu vel þeir tengjast hvorir öðrum.
Vúlkanistar eru vinstra megin á hinum pólitíska ási en samt kenna þeir sig einkum við anarkisma, eða stjórnleysi. Fyrstu hryðjuverkin sem vitað er til að þeir hafi framið voru nokkrar bílabrennur árið 2011.
