Átján ára fegurðardrottning, Trinity Poague að nafni, var handtekinn síðastliðinn föstudag í Georgíufylki í Bandaríkjunum. Hún er grunuð um að hafa myrt eins og hálfs árs gamlan son kærasta síns.
Þann 14. janúar síðastliðinn var komið með drenginn Jaxton Drew Williams á bráðamóttöku Phoebe Sumter sjúkrahússins í bænum Americus. En það er háskólabær sunnarlega í Georgíufylki.
Jaxton var á lífi þegar komið var með hann á sjúkrahúsið en illa haldinn og meðvitundarlaus. Lést hann eftir árangurslausar tilraunir heilbrigðisstarfsfólks að bjarga honum.
Lögreglan var kölluð til að rannsaka andlát drengsins. Eftir yfirheyrslur og rannsókn sönnunargagna var hin átján ára Trinity Poague handtekin.
Trinity var kærasta Julian „Ja“ Williams, föður Jaxton en hann hafði fullt forræði yfir drengnum. Hún er nemandi á fyrsta ári í Georgia Southwestern State háskólanum og ríkjandi fegurðardrottning í bænum Donalsonville í Georgíu.
Talið er að manndrápið hafi verið framið innan veggja háskólans, það er að segja á heimavistinni.
„Við erum mjög særð og ráðvillt, við eigum erfitt með að trúa þessu,“ sagði Cecilia Smith, vinkona Julian, við sjónvarpsstöðina Fox News. „Ja er að reyna að komast af eins vel og hann getur en þetta er augljóslega mjög erfitt fyrir hann. Hann vill ekki tala við neinn um neitt núna.“
Cecilia hefur komið af stað söfnun fyrir Julian á hópfjármögnunarsíðunni GoFundMe. Um 10 þúsund dollarar hafa safnast, eða tæplega ein og hálf milljón króna.
Af áverkunum á litla Jaxton að dæma er talið að hann hafi látist vegna barsmíða. Trinity er nú í varðhaldi í fangelsinu Sumter County Jail og verður ekki sleppt lausri á tryggingu.
Búist er við því að hún verði ákærð fyrir morð af ásetningi, alvarlega líkamsárás og ofbeldi gegn börnum.
Rannsókn málsins er hins vegar ekki lokið og hefur lögreglan í Sumter sýslu óskað eftir því að allir sem kunna að hafa einhverjar upplýsingar um málið gefi sig fram.
