Katrín Jakobsdóttir forsætisráðherra sagði að ekki væri hægt að tryggja að Grindvíkingar gætu snúið alfarið aftur heim. Uppkaup á íbúðum væri ein leiðin sem verið væri að skoða. Ríkið ætlaði að taka óvissuna og ábyrgðina yfir til sín.
Fyrst og fremst væri verið að skoða leiðir til að leysa Grindvíkinga undan sínum veðskuldbindingum gagnvart sínum lántakendum, fái sitt eigið fé og geti þar með komið sér fyrir í nýju húsnæði utan Grindavíkur.
„Þetta er stór ákvörðun. Hún varðar bæði Grindvíkinga og framtíð þessa byggðalags,“ sagði Katrín. Þessi ákvörðun væri hins vegar geymd að svo stöddu, í samráði við bæjarstjórn Grindavíkur.
Ríkisstjórnin kynnti aðgerðir fyrir Grindvíkinga á blaðamannafundi klukkan 13:30 í dag. Samráð var haft við stjórnarandstöðuflokkana. Bæði Þorgerður Katrín Gunnarsdóttir, hjá Viðreisn, og Sigmundur Davíð Gunnlaugsson, hjá Miðflokknum, sögðust hafa viljað sjá meiri aðgerðir. Í heildina er þó breiður pólitískur stuðningur á bak við þessar aðgerðir sem eru boðaðar.
Settur verður á fót samráðsvettvangur á Alþingi, undir forystu fjármálaráðherra, um hvernig framtíðin verður. Finna þurfi leiðir til að milda höggið á ríkissjóð í ljósi mikillar verðbólgu. Frumvarð verður lagt fram í febrúar með leiðum til að leysa Grindvíkinga undan sínum skuldbindingum.
Skammtímaðgerðir sem ráðist verður í eru meðal annars framlenging launastyrks og húsnæðisstyrks. Þá verður sérstaklega hugsað til barnmeiri fjölskyldna í því samhengi.
Þá verða fleiri íbúðir keyptar í gegnum Bríet leigufélag til að mæta húsnæðisþörfinni.
Sigurður Ingi Jóhannsson, innviðaráðherra, nefndi að verið væri að skoða leiðir til meðallangs tíma. Svo sem að koma upp bráðabirgðahúsnæði fyrir einstaklinga. Einnig sé til skoðunar að flytja inn húseiningar til að auka framboð á markaði.
Þá er verið að hefja samtal við atvinnulífið. Það er hvort og hvaða starfsemi er hægt að halda úti í bænum. Einnig er verið að huga að verðmætabjörgun, það er að fólk geti komið búslóðum sínum í skjól sem og fyrirtækin eignum sínum.
Fréttin verður uppfærð
