Lögreglan á Suðurnesjum tilkynnti fyrir stuttu á Facebook-síðu sinni að tveir einstaklingar hafi látist í umferðarslysi sem varð á Grindavíkurvegi á tólfta tímanum í dag.
Í tilkynningunni segir að embættið hafi slysið til rannsóknar.
Tilkynnt hafi verið um slysið til Neyðarlínunnar um klukkan 11:35 og hafi viðbragðsaðilar farið strax á vettvang. Tvö ökutæki hafi verið utan vegar þegar lögregla og viðbragðsaðilar komu að. Ökumaður og farþegi annars ökutækisins hafi verið úrskurðuð látin á vettvangi.
Rannsókn lögreglu sé á frumstigi en miði að því að upplýsa um tildrög slyssins. Rannsóknarnefnd samgönguslysa hafi verið upplýst um slysið og Tæknideild lögreglunnar á Höfuðborgarsvæðinu fengin til að aðstoða við vettvangsrannsókn. Grindavíkurvegi hafi verið lokað um tíma á meðan vettvangsrannsókn hafi farið fram en vegurinn hafi verið opnaður á ný.
Mikil hálka hafi verið á slysstað, en veðuraðstæður góðar. Unnið sé að því að tilkynna aðstandendum um slysið og veiti lögreglan ekki frekari upplýsingar að svo stöddu.
