Í tilkynningu frá Veðurstofu Íslands segir að talsvert hafi snjóað í fjöll í hvassri austanátt á Austfjörðum en rignt á láglendi. Vitað sé um nokkur smærri flóð í Norðfirði og eitt úr Skágili ofan við Neskaupstað sem stöðvaðist nokkuð ofan við skógrækt. Líklega hafi þó fleiri flóð fallið í nótt og í morgun á Austfjörðum.
Ákveðið hafi verið að lýsa yfir hættustigi og rýma reiti 4 og 6 á Seyðisfirði en ekki sé talin hætta á öðrum stöðum eins og staðan sé metin nú. Reitirnir sem rýmingin taki til séu undir Strandartindi og ekki þurfi mjög stór flóð til að ógna þeim reitum.
Í tilkynningu frá Lögreglunni á Austurlandi segir að á þessum reitum sé búið í tveimur húsum og þau þegar verið rýmd. Veginum undir Strandartindi hafi einnig verið lokað á sama tíma. Rýming standi til morguns.
Veðurstofan segir enn fremur að veðurspá sýni áframhaldandi austanátt með snjókomu til fjalla en rigningu á láglendi og neðri hluta hlíða. Því megi búast við votum snjóflóðum og mögulega krapaflóðum á láglendi þegar líður á kvöldið.
Ekki sé búist við hraðfara þurrum flóðum í þessu veðri með langt úthlaup eins og í snjóflóðahrinunni í mars á síðasta ári.
Á þriðjudag dragi úr úrkomu með stöku éljum til fjalla og skúrum á láglendi og ætti þá að draga úr snjóflóðahættu en mögulega geti verið krapaflóðahætta áfram.