Maðurinn sem fannst látinn í Eyjafirði á laugardagskvöld hét Jónas Vigfússon, hann var 71 árs að aldri. Jónas lætur eftir sig eiginkonu, tvær uppkomnar dætur og sjö barnabörn. Jónas var fæddur árið 1951, bóndi á Litla-Dal í Eyjafjarðarsveit og var hann fyrrverandi sveitarstjóri í Eyjafjarðarsveit og áður í bæði Hrísey og á Kjalarnesi.
Jónas var við smalamennsku hátt upp í hlíðum Hagárdals að norðanverðu þegar viðbragðsaðilum barst beiðni um aðstoð. Mjög erfiðlega gekk að komast til hans og þá var ekki hægt að notast við þyrlu Landhelgisgæslunnar vegna misvinda í dalnum og mikils uppstreymis. Var Jónas látinn þegar viðbragðsaðilar náðu til hans.
Sjá einnig: Látinn þegar björgunarsveitarmenn náðu til hans
Mbl.is greinir frá því að amkvæmt upplýsingum frá ekkju Jónasar hafi Jónas ekki látist af slysförum, en orsök andlátsins sé ókunn. Vill fjölskylda Jónasar koma á framfæri innilegu þakklæti til viðbragðsaðila.
