Rex Heuermann, sem grunaður er um að vera hinn svokallaði Gilgo strandar raðmorðingi, gaf fyrrverandi samstarfskonu sinni íslenska ullarpeysu. Hann sýndi henni einnig ógnandi og skrýtna hegðun.
Konan, sem heitir Muriel Henriquez, segir sögu sína í séstakri útgáfu af þættinum 48 Hours hjá bandarísku fréttastofunni CBS. Henriquez starfaði með Heuermann hjá arkitektaskrifstofunni RH Consulting & Associates, sem hann átti.
Meðal þess sem hún greindi frá var að Heuermann hefði gefið henni íslenska ullarpeysu árið 2007. En Ása Ellerup, hin íslenska eiginkona Heuermann, hafði keypt hana í heimsókn til Íslands þetta ár.
Henriquez segist velta því fyrir sér hvort að Heuermann hefði nýtt sér tækifærið á meðan Ása var á Íslandi til þess að myrða konu að nafni Maureen Brainard-Barnes sem hvarf á þessum tíma. En hún er ein af þeim konum sem Heuermann er grunaður að hafa myrt og grafið á Gilgo ströndinni, skammt frá Massapequa Park í New York þar sem þau Ása bjuggu og hún býr enn.
Margir hefðu kannski fleygt grip sem minnti þá á jafn skelfilegan hlut en Henriquez ákvað að halda peysunni. Hún segist hafa haldið upp á peysuna til þess að minna sig á tvær konur sem eru fórnarlömb í þessu máli, Brainard-Barnes og Ásu Ellerup.
„Eiginkonan er líka fórnarlamb,“ segir Henriquez. „Hann bað hana um að koma til baka með gjafir handa samstarfsfólki hans. Svo sveik hann hana líka.“
Henriquez segir að hegðun Heuermann hafi verið undarleg og ógnandi. Hann hafi sífellt viljað vita hvar hún væri niðurkomin. Meðal annars á fjörutíu ára afmælinu hennar, þegar hún var stödd á skemmtiferðaskipi.
Hún hafi sagt honum að hún yrði úti á rúmsjó og að hann gæti aldrei fundið hana. En hann hefði sagst geta það.
Í þessari ferð var umslagi laumað undir hurðina hjá henni. Í bréfinu stóð: „Ég sagði þér að ég gæti fundið þig hvar sem er.“ Í ljósi þess sem sé að koma í ljós þessi misserin hefur Henriquez hugsað til baka til þessa atviks með kalt vatn á milli skinns og hörunds.
