Það hefur ekki dregið úr vangaveltum fólks um höllina að flugbann hefur verið sett í lofthelginni fyrir ofan hana. Business Insider segir að að neðanjarðargöng hafi verið gerð undir og við höllina.
Mikil leynd og dulúð hefur einkennt höllina en svo undarlegt sem það er þá eru teikningar af henni aðgengilegar á netinu.
Business Insider segir að hægt sé að sjá teikningarnar hjá Metro Style, rússnesku verktakafyrirtæki sem hefur lagt upp laupana, og á þeim sjáist að undir höllinni eru tvenn aðskilin göng sem tengjast með lyftu.
Á teikningunum sést að göngin eru umlukin þykkri steypu og að í þeim séu vatnsleiðslur, loftræsting og rafleiðslur auk ljósa og ýmissa leiðsla sem eru nauðsynlegar til starfrækslu stjórnstöðvar.
Allur þessi búnaður gerir að verkum að það er hægt að hafast við í göngunum dögum saman og jafnvel vikum saman.
Michael C. Kimmage, sem starfaði áður hjá bandarískum yfirvöldum að málefnum Rússlands og Úkraínu, sagði að þetta segi ákveðna sögu um hræðslu Pútíns. „Pútín er töluvert hræddur við að vera ekki löglegur leiðtogi Rússlands. Hann veit að völd hans geta ekki byggst á kosningum og því reynir hann að hámarka öryggi sitt með vel vörðu húsnæði,“ sagði Kimmage.
Ef flýja þarf frá höllinni þá liggja göngin beint niður að Svartahafinu þar sem er hægt að hafa farartæki tilbúin til brottflutnings.
Gögnin eru annars vegar 40 metra löng og hins vegar 60 metra löng. Bæði eru þau sex metrar á breidd.