Á rússneska samfélagsmiðlinum Vkontakte, sem svarar til Facebook, er lýst eftir Dmitry Vytovto, rússneskum hermanni. Það er eiginkona hans sem lýsir eftir honum og hefur gert mánaðarlega síðan í júní á síðasta ári. „Leita að eiginmanni og föður. Hjálpið mér að finna einhvern sem veit eitthvað,“ segir í færslu hennar.

En hún hefur ekki fengið nein viðbrögð við auglýsingunni. Eiginmaður hennar er einn af þeim tugum þúsunda rússneskra hermanna sem hafa horfið í Úkraínu. Hugsanlega eru sumir í haldi Úkraínumanna en margir hafa líklega fallið á vígvellinum.

En þegar ekkert lík er til staðar geta ættingjarnir ekki jarðsett viðkomandi né fengið bætur frá rússneska ríkinu. Ástæðan er að hermaðurinn er ekki skráður opinberlega sem fallinn.

Novaya Gazeta segir að eftirlýsingin eftir Vytovtov sé því langt frá því að vera sú eina sinnar tegundar á rússneskum samfélagsmiðlum.

Miðillinn hefur farið yfir tæplega 10.000 færslur á Vkontakte þar sem lýst er eftir rússneskum hermönnum. Báru blaðamenn kennsl á 1.365 horfna hermenn, hið minnsta, með þessu.

En það eru ekki allir ættingjar sem auglýsa opinberlega eftir horfnum hermönnum og því er talið að fjöldi horfinna hermanna sé miklu  meiri en þessi tala segir til um. Sergei Krivenko, leiðtogi mannréttindahópsins „Borgari“ sagði að flestir þeirra, sem saknað sé, séu látnir en lík þeirra hafi ekki fundist. Nú sé vitað um 12.000 staðfest andlát en líklega sé fjöldi horfinna, tvöfalt meiri.

Greining Novaya Gazeta sýnir að týndu hermennirnir hafi að meðaltali barist í stríðinu í 60 daga áður en þeir hurfu.