Lögreglan á höfuðborgarsvæðinu leitar ökumanns bifreiðar sem ók á ungan pilt á rafmagnshlaupahjóli á gangbraut á Neshaga í Reykjavík, hjá Melaskóla, sl. föstudagsmorgun, 24. mars, rétt fyrir níu, eða um kl. 8.50. Fyrrnefndur ökumaður nam staðar á vettvangi og átti orðaskipti við piltinn, en ók síðan á brott. Lögreglu var tilkynnt um slysið í dag, en við skoðun á slysadeild höfðu komið í ljós áverkar á piltinum, sem er á grunnskólaaldri.
Við atvik eins og þetta er mikilvægt að ökumenn gangi úr skugga um að engin meiðsl hafi hlotist af né að skemmdir hafi orðið. Sömuleiðis er áríðandi að tilkynna málið til lögreglu, ekki síst vegna þess að áverkar eru ekki alltaf sjáanlegir á vettvangi. Lögreglan biður umræddan ökumann um að gefa sig fram en hafi aðrir orðið vitni að slysinu eru hinir sömu beðnir um að hafa samband í síma 444 1000. Upplýsingum um málið má sömuleiðis koma á framfæri í tölvupósti á netfangið abending@lrh.is
Uppfært kl. 21.09:
Ökumaðurinn sem lýst var eftir í dag hefur gefið sig fram.
