Fanney Birna Jónsdóttir, lögfræðingur og blaðamaður, hefur verið ráðin nýr dagskrárstjóri Rásar 1. Fram kemur í tilkynningu frá Stefáni Eiríkssyni útvarpsstjóra að leitað hafi verið að stjórnanda með reynslu og þekkingu á starfsemi fjölmiðla, menningu og listum „framúrskarandi samskiptahæfni, leiðtogafærni og hæfni til að leiða árangursríka samvinnu auk annarra hæfniskrafna.“

Fanney Birna er fyrrverandi fréttastjóri Fréttablaðsins, fyrrverandi aðstoðarritstjóri Kjarnans og hafði umsjón með Silfrinu á RÚV um árabil. 

Átján sóttu um starfið sem auglýst var í síðasta mánuði, tveir þeirra drógu umsókn sína til baka. Á meðal þeirra sem sóttu um starfið eru Guðni Tómasson dagskrárgerðarmaður á Rás 1,  Júlía Margrét Einarsdóttir, verkefnastjóri vefútgáfu og dagskrárgerðarkona á RÚV, og Gunnhildur Arna Gunnarsdóttir, blaðamaður á Læknablaðinu, hún er fyrrverandi umsjónarmaður Morgunútvarps Rásar 2 og fyrrverandi ritstjóri dagblaðsins 24 stunda. Systkinin Lára og Þorfinnur Ómarsbörn sóttu einnig um, en bæði eiga langan feril í fjölmiðlum. Lára var meðal annars  fréttamaður í fréttaskýringaþættinum Kveik á RÚV, síðast starfaði hún sem samskiptastjóri fjárfestingafélagsins Aztiq. Þorfinnur stýrði meðal annars Íslandi í dag á Stöð 2 og Vikulokunum á Rás 1.

María Björk Ingvarsdóttir, fyrrverandi framkvæmdastjóri sjónvarpsstöðvarinnar N4, sótti einnig um, en hún er fyrrverandi fréttamaður á RÚV. og  Þorsteinn J. Vilhjálmsson, sem hefur starfað hjá RÚV, Bylgjunni og var meðal annars einn stjórnenda í Íslandi í dag á Stöð 2. Þorsteinn fékk nýlega Blaðamannaverðlaun fyrir þætti sem sýndir voru á RÚV um Skeggja Ásbjarnarson kennara, þar sem flett var ofan af brotum hans gegn nemendum sínum.