Maður lést í morgun eftir að hafa fundist meðvitundarlítill í íbúð á Grundarstíg í Þingholtunum. Greindi lögregla frá því að tveir hafi verið handteknir vegna málsins.

Vísir greinir nú frá því, með vísan í samtal við Grím Grímsson yfirlögregluþjón, að ekki sé að svo stöddu talið að andlátið hafi borið að með saknæmum hætti. Málið muni þó skýrast betur í dag.

Grímur sagði í samtali við mbl.is að „það virðist vera ólíklegt að þetta andlát sé af mannavöldum“. Enn eigi þó eftir að yfirheyra fleiri.

Ævar Pálmi Pálmason hjá miðlægri rannsóknardeild lögreglunnar á höfuðborgarsvæðinu sagði í samtali við fréttastofu RÚV að minni líkur en meiri séu á því að andlátið hafi borið að með saknæmum hætti.

Lögregla hóf endurlífgun strax á vettvangi en báru þær tilraunir ekki árangur og maðurinn var úrskurðaður látinn á sjúkrahúsi.

Mennirnir tveir, sem voru handteknir í íbúðinni, voru fluttir í fangageymslu. Sagði Grímur í samtali við Fréttablaðið að hann búist síður við því að krafist verði gæsluvarðhalds yfir mönnunum.

Hefur lögregla ekki svarað því til hvort áverar hafi verið á manninum sem lést en mun rannsókn málsins vera í fullum gangi.