Mæðginin Guðmundur Sölvi Ármannsson, 13 ára, og Ragnheiður Sölvadóttir, gengu á fund Willums Þórs Þórssonar heilbrigðisráðherra fyrr í kvöld. Guðmundur Sölvi fæddist með tvíklofna vör og góm og í viðtali við DV í lok janúar sagðist móðir hans þreytt á áralangri baráttu við kerfið, baráttu sem hefur staðið yfir í níu ár.

Ragnheiður þreytt á margra ára baráttu – „Fullkomið ferli myndi fela í sér að ég gæti sinnt barninu mínu en ekki kerfinu“

Guðmundur Sölvi fékk bréf frá Sjúkra­tryggingum Ís­lands þar sem honum var tilkynnt að stofnunin tæki ekki þátt í frekari niður­greiðslu vegna tann­réttinga nema hann fari í endurmat hjá tann­­lækna­­deild Há­­skóla Ís­lands. Furðar móðir hans sig á því að hann þurfi ítrekað í endurmat og skoðanir.

„Frábær áheyrn heilbrigðisráðherra og tók hann vel í okkar mál og var hann líka held ég pínu hissa á öllu þessu ferli, drengurinn afhenti ráðherra bréfin og var mikið hrósað fyrir að hafa komið með. Munum við fá boð von bráðar til ráðherra í ráðuneyti ásamt stjórn félagsins,“ skrifar Ragnheiður í færslu á Facebook. Og birtir mynd af Guðmundi Sölva og Willum Þór.

„Hversu galið er það að setja barn í þessa óvissu í miðri meðferð?“