Fyrirtækið Streaming Media, sem sérhæfði sig í að selja og þjónusta búnað og kerfi fyrir til að streyma myndböndum og hljóði hefur verið úrskurðað gjaldþrota. Stjórnarformaðurinn hefur verið ákærður fyrir fjárdrátt.
Að því sem DV kemst næst var Streaming Media stofnað árið 2013 og var til húsa að Dalvegi 16B í Kópavogi. Samkvæmt upplýsingum á heimasíðu þess var fyrirtækið tengt rafbúnaðarþjónustunni Feris sem var til húsa á sama stað.
Segir að meginhlutverk fyrirtækisins hafi verið að útvega og selja réttindarvarið sjónvarpsefni fyrir hótel, veitingastaði og önnur fyrirtæki. Streaming Media hafi verið með umboðssamning við BBC Worldwide og fleiri aðila.
Fyrirtækið seldi einnig og þjónustaði búnað til að streyma mynd og hljóðefni, það er af gerðinni Hibox, og leigði einnig IPTV sjónvarpskerfi.
Árið 2017 var heimasíðu Streaming Media lokað og ári seinna heimasíðu Feris.
Í Lögbirtingablaðinu er greint frá því að Streaming Media, nú til heimilis að Tjarnarbakka 6 í Reykjanesbæ, hafi verið tekið til gjaldþrotaskipta í Héraðsdómi Reykjaness þann 1. desember síðastliðinn. Skiptafundur verður haldinn 21. febrúar næstkomandi.
DV greindi frá því 2. janúar á þessu ári að stjórnarformaður og einn af eigendum Streaming Media hefði verið ákærður fyrir fjárdrátt. Var hann kallaður fyrir dóm þar sem ekki hafði tekist að birta honum ákæruna.
Maðurinn, sem er á sextugsaldri og var prókúruhafi félagsins, var sakaður um að hafa tekið 640 þúsund krónur í reiðufé út af reikningi félagsins þann 4. desember árið 2018 og nýtt í eigin þágu. Fjárdráttur af þessu tagi getur varðað allt að 6 ára fangelsi samkvæmt hegningarlögum.
