Falsfrétt um að bóluefni við covid-19 hafi verið bönnuð á Íslandi gengur nú um netheima eins og eldur í sinu. Falsfréttin var skrifuð á vefsíðu bóluefnaandstæðinga sem kallast News Addicts.
„Ísland bannar covid sprautur þar sem óútskýrð dauðsföll hafa rokið upp,“ er fyrirsögnin sem skrifuð var á vefinn þann 25. nóvember síðastliðinn.
Segir þar að vegna „umframdauðsfalla, heilablóðfalla, blóðtappa, skyndilegra hjartaáfalla og annarra „óútskýrðra“ heilbrigðisvandamála sem haldi áfram að breiðast um heiminn hefur ríkisstjórn Íslands tekið ákvörðun um að banna covid mRNA sprautur á eyríkinu.“
Falsfréttinni hefur verið deilt meira en 1.300 sinnum á samfélagsmiðlum, einkum á miðlinum X en einnig á Facebook. Í henni er vitnað í bloggsíðu konu að nafni Sasha Latypova sem kom á ráðstefnu bóluefnandstæðinga á Íslandi í október síðastliðnum.
„Sex vikum seinna upplýstu skipuleggjendur ráðstefnunnar Latypova um að íslenska ríkisstjórnin hefði tilkynnt að frá næstu viku yrðu covid-19 sprautur ekki í boði á Íslandi,“ segir í falsfréttinni.
Þar sem falsfréttin var komin á flug á samfélagsmiðlum leituðu fréttamiðlar skýringa. Fréttastofan Reuters fékk staðfestingu þann 29. nóvember á að íslensk stjórnvöld hefðu ekki bannað covid bóluefni. Einnig upplýsti Guðrún Aspelund, sóttvarnarlæknir, um að það væru engin bylgja dauðsfalla á Íslandi þessi misserin.
Að sögn Guðrúnar er núna verið að nota bóluefnið Comirnaty XBB.1.5/Pfizer gegn covid 19. Þetta haust hafi verið mælt með því fyrir alla sem eru 60 ára og eldri og þá sem eru með undirliggjandi sjúkdóma og eru 5 ára og eldri.
