Frá því að Yevgeny Prigozhin lést í flugslysi í vesturhluta Rússland í ágúst hefur framtíð Wagnermálaliðafyrirtækisins verið í uppnámi. Ekki virðist hafa komist ró á þrátt fyrir að tilkynnt hafi verið að Pavel Prigozhin, sonur Yevgeny tæki við stjórnartaumum málaliðafyrirtækisins en það var faðir hans sem stofnaði það.

Í stöðuuppfærslu breska varnarmálaráðuneytisins um gang stríðsins í Úkraínu kemur fram að stór hluti af málaliðunum hafi gengið rússneska ríkinu á hönd og að flest bendi til að rússnesk stjórnvöld hafi meiri stjórn á aðgerðum Wagnerhópsins og fyrrum liðsmanna hans en nokkru sinni áður.

Ráðuneytið segir að Wagnerliðum hafi verið dreift og sendir til margra herdeilda. Í lok október hafi Wagnerhópurinn líklega verið settur undir stjórn rússneska þjóðvarðliðsins og sé aftur farinn að afla nýrra liðsmanna.

Ráðuneytið segir að hluti Wagnerliða hafi gengið til liðs við annað rússneskt málaliðafyrirtæki, Redut.