Sólveig Anna Jónsdóttir formaður Eflingar greindi síðastliðinn sunnudag, í færslu á Facebook-síðu sinni, frá samskiptum sínum við Diljá Mist Einarsdóttur, þingmann Sjálfstæðisflokksins og formann utanríkismálanefndar Alþingis. Sólveig segir að Diljá Mist hafi kallað hana ókurteisa og sagt eitthvað á þá leið að hún væri betur upp alin.

Sólveig segir að samskipti þeirra hafi átt sér stað á fundi þennan sama dag. Líklega er Sólveig að vísa til málfundar um ástandið fyrir botni Miðjarðarhafs sem fram fór í fyrirlestrarsal Þjóðminjasafnsins en Diljá Mist var ein frummælenda á fundinum.

Sólveig segist hafa svarað Diljá Mist með því að vísa til föður síns heitins, útvarpsmannsins og tónskáldsins, Jóns Múla Árnasonar og þess uppeldis sem hann veitti henni. Hún segir föður sinn hafa veitt sér gott uppeldi og meðal annars kennt sér að það væri ekkert verra en að vera vondur og heimskur:

„Hann kenndi mér margt og reyndi að kenna mér fleira. Í dag var ég á fundi þar sem Diljá Mist þingkona Sjálfstæðisflokksins og formaður utanríkismálananefndar Alþingis sagði mig ókurteisa og bætti svo einhverju við um að uppeldi hennar hefði verið fremra því sem ég hlaut. Ég sagðist þakklát fyrir að hafa hlotið annarskonar uppeldi en það sem hún fékk. Og það er ég sannarlega. Pabbi minn kenndi mér að best væri að kalla hlutina réttum nöfnum. Það var góð lexía. Og hann kenndi mér að slæmt væri að vera heimskur, og vont að vera vondur, en ekkert verra en að vera bæði vondur og heimskur. Það er leitt að sú blanda sé svo útbreidd sem raun ber vitni.“