Staðan í Grindavík er óbreytt frá því í gær og teygist kvikugangurinn undir bæinn. Um 500 skjálftar hafa mælst í kvikuganginum og enginn þeirra var yfir 3 af stærð í nótt. Þá virðast skjálftarnir ekki vera að grynnka.

Þetta kom fram í fréttum RÚV klukkan 7 í morgun.

Gunnar Schram, yfirlögregluþjónn hjá lögreglunni á Suðurnesjum, var til viðtals og var hann spurður út í það hvað tæki við ef eldgos hefst á næstu klukkustundum, en áfram eru taldar miklar líkur á eldgosi.

„Þá verður lagt mat á stöðuna, hvers eðlis gosið er, hvar það kemur upp sem skiptir meginmáli og við taka þá væntanlega varnaraðgerðir til að verja mikilvæg mannvirki myndi ég segja. Því að við höfum rýmt svæðið,“ sagði hann og nefndi Grindavíkurbæ og Svartsengissvæðið. „Þannig að þetta mun fyrst og fremst snúa að verðmætabjörgun.“

Aðspurður hvort vegum yrði lokað, sagði Gunnar að væri samkvæmt áætlun um eldgos við Grindavík að grípa til lokana. „En það er ekki hægt að segja hvernig það verður fyrir fram þegar við vitum ekki hvar hugsanlegt gos kemur upp.“

Í fréttum RÚV í morgun kom fram að Veðurstofa Íslands og Almannavarnir muni í birtingu ákveða hvort hægt verður að ráðast í verðmætabjörgun af heimilum í Grindavík. Ef af henni verður sé ljóst að fólk fái aðeins að ná í brýnustu nauðsynjar, aðeins einum frá hverju heimili verði þá heimilt að fara inn á svæðið.