Fuglavernd hvetur fólk til þess að taka fram sjónaukana og pennana og taka þátt í árlegri garðfuglakönnun. Auðvelt er að taka þátt og fróðlegt að sjá breytingarnar ár frá ári.
„Ég hef séð fjallafinku birtast í garðinum hjá sér sem er nokkuð sjaldgæfur flækingur og líka smyril,“ segir Guðni Sighvatsson félagi í Fuglavernd og þátttakandi í garðfuglakönnuninni.
Undanfarin ár hafa um 20 heimili tekið þátt en vonir standa til að aukning verði í ár. Þátttakendur þurfa ekki að skrá sig. Þeir geta fyllt út eyðublöð sem finna má á vef Fuglaverndar og skilað þeim í lok tímabilsins, 27. apríl næstkomandi.
Guðni segir að hér sé um að ræða vísindi almennings. Leitað sé til almennings til að skrá upplýsingar um þá staðfugla sem heimsækja garða heimila fólks eða vinnustaða. Bæði tegundirnar og fjöldann, það er hæstu skráningu hverrar tegundar í hverri viku.
Guðni fóðrar garðfugla og segir að það sé lykilatriði til að laða þá að. Mjög sniðugt sé að vera með fóðurskammtara og fræ til að fá fjölbreytta flóru, eða réttara sagt fánu, í garðinn.
„Ég elda hafragraut og skef afganginum út í garð. Þetta er allt horfið þegar ég kem heim. Stararnir og þrestirnir eru vitlausir í þetta á meðan finkurnar og smáfuglarnir eru meira í fræjunum,“ segir Guðni.
Á Íslandi eru tiltölulega fáar fuglategundir og nokkuð auðvelt er að þekkja þær í sundur. Guðni segir að það komist fljótt upp í vana að þekkja þær.
Algengustu tegundirnar eru auðnutittlingar, starar og svartþrestir. Skógarþrestirnir fara flestir til heitari landa á veturna.
„Landið er að breytast með aukinni skógrækt og við erum farin að sjá fleiri skógarfugla hérna. Til dæmis glókolla sem er minnsti fugl í Evrópu. Hann birtist alltaf á veturna,“ segir Guðni.
Lendi fólk í vanda við að bera kennsl á garðfugl er auðvelt að fletta útlitinu upp í Fuglavísi Jóhanns Óla Hilmarssonar, sem er til á flestum heimilum, eða á Fuglavefnum. Íslendingar séu hins vegar almennt nokkuð fróðir um fugla.
