Í borginni Jaffa í Ísrael hefur verið myndaður rótttækur hópur sem samanstendur af bæði Gyðingum og ísraelskum Aröbum.
Eftir að aukin harka og hatursfull orðræða fór á skrið í samskiptum Gyðinga og Araba eftir árás Hamas á Ísrael 7. október síðastliðinn hefur þessi litli hópur, sem fer þó stækkandi, myndað eins konar óopinbera gæslusveit. Er markmiðið að sveitin komi í veg fyrir átök milli almennra borgara meðal Gyðinga og Araba í borgum og bæjum Ísraels.
Meðlimir hópsins hallast flestir til vinstri í stjórnmálum og eru á jaðrinum í ísraelsku samfélagi sem stendur en eru þó lítið dæmi um samvinnu í hringiðu átaka.
Einn af leiðtogum hópsins heitir Amir Badran. Hann er af arabísku bergi brotinn og er kjörinn fulltrúi í bæjarstjórn á svæðinu. Badran segir að hópurinn vilji ekki bara senda íbúum á svæðinu heldur öllum heiminum skilaboð um að það sé til fólk þarna um slóðir sem vilji koma saman og hafna öllu ofbeldi. Hann segist andvaka af áhyggjum yfir því að til enn meiri átaka muni koma á götum úti í Ísrael.
Hópurinn hefur hengt upp veggspjöld á götum úti, á hebresku og arabísku, þar sem fólki er meðal annars boðið að ganga til liðs við hann. Leiðtogar hópsins segjast vita að meðlimir hans séu í miklum minnihluta meðal bæði Gyðinga og Araba en þó eru 3.000 meðlimir í WhatsApp hópum sem hópurinn heldur úti.
Meðlimir hópsins hafa tekið ýmis verkefni að sér sem fela í sér að gæta að öryggi fólks. Þeir veita Gyðingum og Aröbum fylgd við að fara um hverfi sem viðkomandi óttast að vera í, senda Ísraelum sem hafa þurft að flýja heimili sín vegna átakanna vistir og hópurinn hyggur á að vera við öllu búinn ef til aukinna átaka kemur á götum úti og bæði skrásetja þau og jafnvel reyna að stilla til friðar.
Meðlimir hópsins muna allir vel eftir að í síðustu átakahrinu milli Hamas og Ísraels árið 2021 brutust út óeirðir. á götum Jaffa og raunar víðar í Ísrael, sem leiddust út í íkveikjur og rán.
Jaffa er ein af mest blönduðu borgum Ísraels en alls eru 37 prósent íbúa af arabísku bergi brotnir. Á landsvísu í Ísrael eru tæplega 25 prósent íbúa arabar. Meðlimir hópsins segja að Gyðingum og Aröbum í Jaffa semji almennt vel og að litlir hópar öfgamanna úr báðum röðum hafi borið mesta ábyrgð á óeirðunum 2021.
Omar Siksik sem er arabískur og einn af leiðtogum hópsins segir að óeirðirnar hafi veitt Gyðingum og Aröbum í borginni í raun tækifæri til að eiga hreinskilnar samræður um hvað þeir óttuðust. Samræðurnar hafi leitt til aukinnar vináttu á báða bóga.
Eins og í Jaffa sjálfri er meirihluti hópsins Gyðingar. Gyðingarnir í hópnum telja það skyldu sína að vernda arabíska nágranna sína en þeir gera sér grein fyrir að sjónarmið þeirra séu ekki í hávegum höfð víða í Ísrael, sérstaklega eftir árásirnar 7. október.
Það er forgangsmál hópsins að beita sér gegn hvers kyns mismunun í garð fólks í ísraelsku samfélagi sem er af arabísku bergi brotið. Ríkisstjórnir Benjamin Netanyahu, sem hefur verið forsætisráðherra Ísrael síðan 2009, fyrir utan eins og hálfs árs tímabil frá 2021-22, þykja hafa blásið í glæður aukinnar mismununar í garð Araba í Ísrael. Hópar aðgerðasinna segja að stjórnvöld hafi grafið undan tjáningarfrelsinu, einkum eftir árásina 7. október, með því að líkja stuðningi við Palestínumenn í orðum við hvatningu til hermdarverka.
Einn meðlimur hópsins í Jaffa er á þrítugsaldri og Gyðingur. Hann er úr mjög trúaðri fjölskyldu en lítur nú á sig sem anarkista. Hann spyr af hverju ekki sé hægt að elska alla:
„Okkur var alltaf sagt að þau hötuðu okkur svo við yrðum að hata þau líka. Mér fannst eins og það væri eitthvað rangt við þetta.“
Það var NBC sem greindi frá.
