Craig Murray, fyrrverandi sendiherra og uppljóstrari, var stöðvaður á flugvellinum í Glasgow í dag og gert að afhenda tölvu sína og síma á grundvelli þarlendra hryðjuverka. Murray var að koma frá heimsókn til Íslands þar sem hann var gestur Kristins Hrafnssonar, ritstjóra Wikileaks, sem er allt annað en sáttur við framferði breskra yfirvalda.
Murray var sendiherra Breta í Úsbekistan árin 2002-2004 en þá opinberaði hann mannréttindabrot þarlendra stjórnvalda sem gerði það að verkum að hann var settur af. Síðan þá hefur hann starfað sem pólitískur aktívisti og verið ötull talsmaður mannréttinda og baráttumaður gegn spillingu.
„Um helgina var Craig Murray, fyrrverandi sendiherra Breta og uppljóstari, gestur minn á Íslandi. Hann hefur stutt við bakið á baráttunni fyrir frelsi Julian Assange en það hefur Ögmundur Jónasson einnig gert ötullega. Þeir hafa oftar en ekki talað á sömu fundunum erlendis og þekkjast vel. Við Craig mættum á samstöðufund með Palestínumönnum á Austurvelli í gær og köstuðum m.a. kveðju á Ögmund,“ skrifaði Kristinn í færslu á Facebook-síðu sína.
Við heimkomuna til Glasgow var Murray síðan tekinn höndum undir ákvæði sjö í fyrrgreinum hryðjuverkalögum, sem heimilar breskri landamæralögreglu að setja menn í hald á nokkurra skýringa og krefjast þess að viðkomandi afhendi gögn og tæki, ella verði þeir kærðir fyrir brot á lögum. Segir Kristinn að auk raftækjanna sem Murray þurfti að afhenda þá var hann krafinn svara um mætinguna á fundinn á Austurvelli sem og tengsl hans við WikiLeaks og Julian Assange.
„Ég spyr, er runnið algert andskotans ofsóknaræði á menn? Hversu lengi ætlar almenningur að líða svona hraðskrið í átt að algjöru afnámi okkar grunnréttinda áður en rétt þykir að vakna úr svefnrofanum,“ skrifar Kristinn.
