Bindindissamtökin IOGT hafa stefnt Hafnarfjarðarbæ, Sýslumanninum á höfuðborgarsvæðinu og þremur fyrrverandi stjórnarmönnum í Hafnarfjarðardeild félagsins vegna tilfærslu eignarhalds á Gúttó, hinu sögufræga húsi góðtemplara.
„Þetta virkar svolítið eins og frekja,“ segir Aðalsteinn Gunnarsson, framkvæmdastjóri IOGT á Íslandi. Hafnarfjarðardeildin var lögð niður fyrir nokkru síðan en í vor var eignarhaldið á Gúttó við Suðurgötu 7 fært yfir til Hafnarfjarðarbæjar. Það var hins vegar ekki lagt fyrir landsstjórn IOGT.
„Það er þannig í lögum félagsins að allar fjármálahreyfingar þarf að bera undir landsstjórn. Það var ekki gert í þessu tilfelli,“ segir Aðalsteinn.
Gúttó er sögufrægt hús, reist árið 1886 af góðtemplurum í Hafnarfirði, hið fyrsta sinnar tegundar á Íslandi. Í tvígang var byggt við húsið, sem er timburhús með bárujárnsklæðningu.
Húsið var hugsað sem samkomuhús og voru þar lengi haldnir tónleikar og dansleikir. Einnig hefur húsið verið notað sem fundarstaður, meðal annars fyrir verkalýðsfélög og AA samtökin, sem og vettvangur fyrir ýmsa viðburði, svo sem listasýningar og bókamarkaði.
Hafnarfjarðarbær hefur verið með húsið að láni undanfarin ár og séð um rekstur þess og viðhald. Þar er nú meðal annars sýning á vegum byggðasafnsins.
„Við höfum verið í mjög góðu samstarfi við Hafnarfjarðarbæ um notkun á húsinu. Bærinn hefur verið með húsið í láni hjá okkur í langan tíma. Það hefur verið samkomulag um að bærinn noti húsið þó svo að við eigum það,“ segir Aðalsteinn. Nú líti út fyrir að stjórn stúkunnar hafi gefið bænum húsið án heimildar. „Það er búið að taka húsið af IOGT. Sá gjörningur þarf að ganga til baka.“
Þó svo að þremur einstaklingum sé stefnt, stjórnarmönnunum Jóni Kr. Jóhannessyni, Jóni Sigurbjörnssyni og Símoni Jóni Jóhannssyni, þá segir Aðalsteinn að málsóknin snúi ekki að þeim sem persónum.
„Við erum ekki að ráðast á manneskjur. Þetta snýst um gjörninginn. Núna virðist sem Hafnarfjörður sé orðinn eigandinn. Það þarf að breyta því aftur til baka. IOGT á þetta hús. Ekki einhverjir þrír einstaklingar eða Hafnarfjarðarbær,“ segir hann.
Fasteignamat hússins er 70,5 milljón króna en aðspurður um verðmæti hússins segir Aðalsteinn ómögulegt að reikna það út. Húsið sé verndað.
„Ef húsið yrði fært til inn á byggðasafn er lóð undir sem kostar kannski milljarð eða tvo,“ segir hann. Peningar séu hins vegar ekki það sem félagið sé að hugsa um með málsókninni. „Fyrir okkur snýst þetta um prinsipp, að það sé ekki verið að taka eignir félagsins.“
Ívar Bragason, bæjarlögmaður, sagðist ekki geta tjáð sig um málið að svo stöddu.
