Í myndbandi, sem margir tugir þúsunda hafa horft á, sést rússneski hermaðurinn Alexander Leshkov hrópa ókvæðisorð að yfirmönnum sínum í þjálfunarbúðum rússneska hersins nærri Moskvu. „Þú þarft ekki að sitja í skotgröfunum með okkur,“ hrópar Leshkov og blæs síðan reyk í andlit yfirmannsins og gengur svo nærri honum að yfirmaðurinn neyðist til að hörfa.

The Guardian segir að myndbandið hafi verið tekið upp 13. nóvember. Skömmu síðar ræddi Leshkov við fjölmiðilinn Moskovskij Komsomolets þar sem hann sagðist ítrekað hafa reynt að benda á þjálfun og aðbúnaðar hermannanna væri ekki nægilega góður. Þessu hafi yfirmenn vísað á bug og hafi hann einfaldlega fengið nóg.

En þetta fór ekki vel í yfirmenn hans og var hann dreginn fyrir herdómstól ákærður fyrir að hafa valdið yfirmanni sínum „líkamlegu tjóni“ og í síðustu viku var hann síðan dæmdur í fimm og hálfs árs fangelsi.