Nú geisa mjög harðir bardagar um bæinn Soledar, sem er lítill bær nærri Bakhmut í Donets. Úkraínskar hersveitir verjast þar hörðum árásum Wagnerhópsins, sem er málaliðahópur sem starfar fyrir rússnesk yfirvöld.

Þetta segja úkraínskir embættismenn.

Soledar er um átta kílómetra norðaustan við Bakhmut sem Rússar hafa reynt að ná á sitt vald mánuðum saman. Það hefur þeim ekki tekist en mikið mannfall hefur orðið í þeirra röðum sem og hjá Úkraínumönnum. Bardagarnir þar eru hreinn skotgrafahernaður.

Snemma í gær tókst Úkraínumönnum að hrinda árás Wagnerliða við Soledar. Hanna Maljar, varavarnarmálaráðherra, skýrði frá þessu á Telegram. Hún sagði að þrátt fyrir mikið mannfall hafi Wagnerliðar fljótlega hafið nýja sókn.

„Óvinirnir verða bókstaflega að klofa yfir lík fallinna félaga sinna. Þeir nota stórskotalið, flugskeyti og sprengjuvörpur,“ skrifaði hún.

Yevgeni Prighozhin, sem er oft nefndur „Kokkur Pútíns“  hefur mánuðum saman reynt að ná Bakhmut á sitt vald og nú er röðin greinilega komin að Soledar. Hann varpaði ljósi á það um helgina af hverju hann hefur svona mikinn áhuga á að ná Bakhmut á vald Rússa.

„Kokkur Pútíns“ varpar ljósi á af hverju hann vill ná Bakhmut