Kona um fertugt var í gær í Héraðsdómi Reykjavíkur úrskurðuð í gæsluvarðhald til 27. september á grundvelli rannsóknarhagsmuna að kröfu Lögreglunnar á höfuðborgarsvæðinu í þágu rannsóknar hennar á andláti karlmanns á sextugsaldri í íbúð fjölbýlishúss í austurborginni  um helgina, en konan var handtekin á vettvangi.

Þetta kemur fram í tilkynningu frá lögreglunni á höfuðborgarsvæðinu.

Tilkynning um málið barst lögreglu á laugardagskvöld og hélt hún þegar á staðinn og hóf þar endurlífgunartilraunir á manninum. Hann var í framhaldinu fluttur á Landspítalann, en var úrskurðaður þar látinn.

Segir síðan að ekki sé hægt veita frekar upplýsingar um rannsókn málsins að svo stöddu.

Ævar Pálmi Pálmason, svarar fyrir málið fyrir hönd Miðlægrar rannsóknadeildar Lögreglunnar á höfuðborgarsvæðinu. Hann segir að ekki sé hægt að veita upplýsingar um hvort tengsl hafi verið á milli fólksins né hvort það hafi áður komið við sögu lögreglu. Hann segir rannsókn í fullum gangi og beðið sé niðurstöðu krufningar yfir manninum. Ekki verði veittar frekari upplýsingar um málið í bili.

Uppfært kl. 13:26: Samkvæmt mbl.is eru konan og maðurinn íslensk.