James Burke fyrrverandi lögreglustjóri í Suffolk-sýslu í Bandaríkjunum var handtekinn á þriðjudagsmorgun í Suffolk County Víetnam Veterans Memorial garðinum af þjóðgarðsvörðum og sama daga ákærður fyrir að hafa boðið upp á ólöglegt kynferðislegt athæfi, að særa blygðunarsemi fólks og nekt á almannafæri.

Marykate Guilfoyle, talsmaður Suffolk-sýslu, segir að Burke hafi verið handtekinn eftir að hann hafi „beðið um kynferðislegar athafnir“ frá óeinkennisklæddum landverði. Landverðirnir þekktu Burke ekki, en hann gaf deili á sér og reyndi að losna undan handtöku og sagði handtökuna vera opinbera niðurlægingu. Greint var frá handtöku hans á blaðamannafundi en fulltrúi héraðssaksóknara vildi ekki skýra nánar frá hvað Burke hefði gert sem leiddi til handtöku hans. Burke var síðar látinn laus og á að mæta fyrir dóm 11. september næstkomandi. Garðurinn sem Burke var handtekinn í hefur lengi verið griðastaður þeirra sem stunda ólöglegt kynferðislegt athæfi að sögn lögreglunnar og héraðsaksóknarans Ray Tierney. 

Sat í alríkisfangelsi vegna líkamsárásar

Ákæran svertir enn frekar vafasaman orðstír Burke, sem er fyrrum yfirlögreglumaður sýslunnar og var talinn vera einn þeirra hæstvirtustu innan raða lögreglunnar. Burke viðurkenndi að hafa gengið í skrokk á Christopher Loeb árið 2012 eftir að Loeb hafði rænt umfangsmiklu safni Burke af kynlífstækjum. Samkvæmt dómsskjölum og öðrum skýrslum mun Burke einnig hafa neytt fíkniefna í nokkrum tilvikum í slagtogi með vændiskonum, hann flúði vettvang eftir af hafa lent í árekstri og í nóvember árið 2016 var hann dæmdur í 46 mánaða fangelsi fyrir líkamsárás og hindrun rannsóknar, en honum var sleppt úr alríkisfangelsi árið 2018.

Tafði rannsókn Gilgo-strandar morðanna

Stærsta klúðrið á ferilskrá Burke er þó tengt málinu sem altalað er vestanhafs og víðar, meðal annars hérlendis vegna Íslandstengingarinnar, en Burke klúðraði illa rannsókn á Gilgo-strandar morðunum.

Lögfræðingurinn John Ray, sem er fulltrúi fjölskyldna Jessica Taylor og Shannan Gilbert sem fundust látnar á Gilgo-ströndinni segir að Burke hefði yfirtekið rannsóknina og útilokað Alríkislögregluna og fleiri stofnanir frá rannsókn á morðunum eftir að 11 lík fundust á ströndinni árið 2010.

Fyrrum öldungadeildarþingmaðurinn Phil Boyle hefur lengi verið gagnrýninn á vinnubrögð Burke á Gilgo-strandar morðunum, og gekk svo langt að fara fram á ríkið myndi yfirfara vinnubrögð Burke við rannsóknina. Á þriðjudag ítrekaði Boyle að hann teldi Burke hafa hindrað tilraunir til að leysa Gilgo-strandar morðin í mörg ár.

„Burke hefur greinilega komið persónulega að kynlífsviðskiptum í áratugi og mun að öllum líkindum gera það áfram,“ segir hann við The Post. „Ég tel að það sé ein helsta ástæða þess að Gilgostrandar-raðmorðingjamálið var óleyst í yfir 13 ár.“

Héraðsssaksóknarinn Tierney sagði að ferill Burke hefði átt að koma í veg fyrir starf hans sem æðsti lögreglumaður sýslunnar. „Ég held að blaðamannafundurinn á þriðjudag hafi líklega verið haldinn 11 árum of seint,“ sagði Tierney. „Ráðamenn Suffolk-sýslu hefðu aldrei átt að setja þennan mann í valdastöðu.“