Í tilkynningu frá Íslenskri erfðagreiningu kemur fram að vísindamenn hjá fyrirtækinu, í samvinnu við Landspítala háskólasjúkrahús, hafi fundið þrjátíu erfðabreytileika sem hafa áhrif rúmmál heilans. Einnig hafi meðal annars fundist fylgni á milli breytileikanna og menntunarstigs, taugaþroskaraskanna og taugasjúkdóma.

Í tilkynningunni kemur fram að þessari rannsókn var nýlega lýst í tímaritinu Brain Communications. Vísindamennirnir beittu víðtækri erfðamengisskimun til að leita breytileika með fylgni við rúmmál heila og tvöfaldaði skimunin fjölda slíkra breytileika og veitti nýja innsýn í líffræðina sem þar býr að baki.

Fylgni hafi fundist á milli breytileikanna og rúmmáls ákveðinna heilasvæða, menntunarstigs (e. educational attainment), taugaþroskaraskanna og taugasjúkdóma. Einstaklingar með Parkinsons sjúkdóm hafi stærri heila og einstaklingar með ADHD minni heila, en þeir sem ekki hafa þessa breytileika.

Í tilkynningunni segir að vísindamennirnir hafi sýnt fram á með mendelsku slembivali að breytileikar, sem stuðla að auknu rúmmáli heila, stuðla beint að Parkinsons sjúkdómi, og minnka líkur á ADHD. Niðurstöður annarra sem einnig hafi beitt mendelsku slembivali hafi bent til marktækra áhrifa breytileika, sem hafa áhrif á námsárangur, á Parkison sjúkdóminn. Niðurstöður þessarar rannsóknar bendi til þess að aukið heilarúmmál sé líklegri skýring á aukinni áhættu á Parkinson sjúkdómi en að rekja megi hana til menntunar.