Eigendur Reiðskóla Reykjavíkur, hjónin Edda Rún Ragnarsdóttir og Sigurður Vignir Matthíasson, segja að upplýsingar um meint kynferðisbrot fatlaðs manns sem sótt hefur reiðnámskeið hjá skólanum og aðstoðað með hesti eftir hádegi, hafi komið þeim í opna skjöldu. Í tilkynningu til DV kemur fram að brugðist hafi verið samdægurs við og að maðurinn muni ekki koma nálægt reiðskólanum framar né aðstoða í hesthúsum þeirra.
Eins og DV greindi frá steig móðir ungrar stúlku, Halla Ingibjörg Leonhardsdóttir, fram með færslu á Facebook þar sem hún greindi frá því að maðurinn hefði brotið gegn dóttur sinni á námskeiði í Reykjadal síðasta sumar en ynni þrátt fyrir það áfram með börnum í umræddum reiðskóla og í svipuðum aðstæðum og þegar hann komst í tæri við dóttur hennar.
Halla Ingibjörg sagðist að aðili sér tengdur hefði heyrt í eigendum skólans, Eddu Rún og Sigurði, sem hafi komið af fjöllum og ekki haft hugmynd um málið. Hafði maðurinn verið í þrjú sumur að aðstoða hjá reiðskólanum en móðir mannsins, þjóðþekkt fréttakona, hefði ekki upplýst eigendurna um ásakanirnar á hendur syni sínum.
„Um hádegi í gær, 28. júní, fengum við upplýsingar um að fatlaður maður, sem hefur undanfarin þrjú ár verið á reiðnámskeiði hjá okkur og hjálpað okkur með hrossin eftir hádegi, hefði verið sakaður um kynferðisbrot. Umræddur maður hefur aldrei verið starfsmaður hjá okkur en hefur fyrir greiðasemi fengið að vera eftir hádegi til aðstoðar í hesthúsunum. Á þeim tíma var hann aldrei að hjálpa til við reiðnámskeiðin, né var hann einn með nemendum eða eftirlitslaus í húsunum vegna fötlunar sinnar,“ segir í tilkynningunni frá Eddu Rún og Sigurði.
Upplýsingar um að maðurinn lægi undir grun um kynferðisbrot komu þeim fullkomlega í opna skjöldu.
„Við brugðumst við samdægurs og mun hann ekki koma nálægt reiðskólanum framar né aðstoða í hesthúsum okkar. Við hörmum að þessar aðstæður hafi komið upp og höfum þegar brugðist við til að tryggja öryggi barnanna, sem er aðalatriðið í okkar augum. Við munum tilkynna Barnavernd Reykjavíkur og lögreglunni um málið. Ef frekari spurningar vakna biðjum við ykkur að hafa samband. Þegar er búið að tilkynna foreldrum allra nemenda sem eru á reiðnámskeiði núna um málið,“ segir ennfremur í tilkynningunni.
