Það bar helst til tíðinda á kvöld- og næturvakt lögreglunnar á höfuðborgarsvæðinu að maður sló annan í andlitið í stigagangi húss eins í Miðborginni. Árásarmaðurinn, sem var óvelkominn í stigaganginum, var óviðræðuhæfur sökum þess hversu annarlegu ástandi hann var í. Hann var vistaður í fangageymslu.

Bifreið var ekið utan í vegrið í Miðborginni. Tveir voru fluttir á sjúkrahús til skoðunar en meiðsl þeirra reyndust minniháttar. Draga þurfti bifreiðina á brott með dráttarbifreið.

Í Breiðholti var bifreið ekið á staur. Ökumaðurinn var fluttur á bráðamóttöku. Ekki liggja fyrir upplýsingar um meiðsli hans. Bifreiðin var flutt á brott með dráttarbifreið.

Einn ökumaður var handtekinn grunaður um að vera undir áhrifum vímuefna.

Tilkynnt var um rúðubrot í Miðborginni.

Nokkrar aðstoðarbeiðnir bárust vegna veðurs.