The Guardian skýrir frá þessu. Andriy Chernyak, fulltrúi leyniþjónustu úkraínska hersins, sagði í samtali við þýska fjölmiðilinn T-Online að herkvaðningin hefjist 15. janúar.
Jacob Kaarsbo, sem er danskur sérfræðingur í rússneskum málefnum hjá hugveitunni Tænketanken Europa, sagðist í samtali við TV2 vera „nokkuð sannfærður“ um að Úkraínumenn hafi komist yfir ákveðnar upplýsingar um þetta. Hann sagði hins vegar annað mál hvernig herkvaðningin mun verða framkvæmd.
Hann benti einnig á að það sé hægt að afla sér upplýsinga en það geri þær ekki réttar. Mikið sé einnig rætt um þetta í Rússlandi, það er hvort gripið verði til almennrar herkvaðningar.
Hann sagðist telja að svo fari en hvort það verði 500.000 menn viti líklega enginn.
Þegar Vladímír Pútín, Rússlandsforseti, tilkynnti um herkvaðningu 300.000 mann í lok september sagði hann að ekki yrði um frekari herkvaðningu að ræða. Með þessari herkvaðningu sveik hann loforð sem hann hafði gefið um að blanda rússneskum borgurum ekki í stríðið og nú stefnir í að hann svíki loforð sitt um að ekki komi til frekari herkvaðningar.
Kaarsbo sagði að það sé tvíeggjað sverð að grípa til herkvaðningar á nýjan leik og þess vegna muni Rússar reyna að einskorða hana við jaðarsvæði og sneiða hjá stóru borgunum.
Hann sagði ekki útilokað að finna 500.000 menn til að kalla í herinn en fjöldi þeirra sé ekki nauðsynlega afgerandi fyrir Rússa eða Úkraínu. Rússar eigi í erfiðleikum með að afla sér búnaðar og vopna fyrir her sinn og margar sögur hafa borist af illa búnum nýliðum og það geti skipt sköpum.
