Hann fer yfir þetta í langri færslu á Twitter og segir meðal annars: „Úkraínumenn hafa að mestu neitað að berjast eins og Rússar vilja. Þeir hafa þróað og beitt eigin hernaðartækni af miklum aga. Hvað geta aðrar þjóðir lært af úkraínska hernum? Í stuttu máli sagt: mikið.“
Hann segir að hægt sé að lýsa hernaðartaktík Úkraínumanna með einu orði: „Tæring.“ Þeim hafi tekist að tæra rússneska herinn líkamlega og andlega. Úkraínumenn hafi þróað þessa hernaðartækni. „Svona lítur stríð á 21. öldinni út,“ skrifar hann.
Hann segir að úkraínski herinn hafi meðal annars ráðist á Rússa þar sem þeir eru veikir fyrir en einnig notað krafta sína í að hægja á þeim og pirra rússnesku hermennina þannig að baráttuandi þeirra hefur minnkað.
Back in May, I examined Ukraine’s military strategy in a thread that I informally called ‘The Ukrainians are Masters of 21st Century War”. Today, an update on the Ukrainian approach – the "strategy of corrosion". 1/25 🧵 pic.twitter.com/9SikgaFjTz
— Mick Ryan, AM (@WarintheFuture) August 1, 2022
Hann segir að Úkraínumönnum hafi tekist vel upp með markvissum árásum á veikustu hluta rússnesku stuðningskeðjunnar, það er fjarskipti, svæði fyrir aftan víglínuna, stórskotalið og herforingja.
Hann segist telja að þetta niðurbrot á móral rússnesku hermannanna hafi valdið því að dregið hefur úr aga innan hersins sem hefur gert að verkum að margir hermenn hafa gerst liðhlaupar, neitað að berjast og ítrekað framið stríðsglæpi.
Hann bendir einnig á að taktík Úkraínumanna sé ekki eingöngu bundin við vígvöllinn. Þeim hafi tekist að nýta sér samfélagsmiðla og skoðanamyndum fólks um allan heim sem hluta af taktík sinni.
Allt frá því að Rússar réðust inn í Úkraínu hafa úkraínskir leiðtogar, embættismenn og ekki síst her landsins birt myndir og færslur um það sem gerist í stríðinu og af mannfalli og tjóni rússneska hersins. Ryan segir að þessi aðferð hafi hert enn frekar á niðurbroti bardagamórals rússnesku hermannanna og ekki síst tryggt Úkraínu aðstoð frá ESB og NATÓ.
