Þetta snýst um að rússneskar borgir og bæir eru gerðir að vinabæjum úkraínskra bæja og borga. Síðan heita vinabæirnir því að aðstoða við uppbygginguna í Úkraínu og reynt er að grafa undan úkraínskum stjórnvöldum.
Flestir hér á landi kannast eflaust við vinabæjaaðferðina en margir bæir hér á landi eiga sér vinabæi hér og þar um heiminn.
Breska varnarmálaráðuneytið segir að þessi aðferð Rússa hafi byrjað að sjást í lok maí þegar rússnesk yfirvöld lýstu því yfir að St Pétursborg væri vinaborg Maríupól sem Rússar lögðu í rúst áður en þeir náðu henni á sitt vald.
Í kjölfar yfirlýsingarinnar tilkynnti borgarstjórinn í St Pétursborg að borgin myndi aðstoða íbúa Maríupól við endurbyggingu hennar. Þetta telur Ivan Preobrazjensky, stjórnmálaskýrandi hjá Moscow Times, vera aðferð Rússa til að flytja ábyrgðina á enduruppbyggingunni frá stjórnvöldum í Kreml til héraðanna sjálfra. Með þessu séu Rússar að stela hugmyndum Vesturlanda um enduruppbyggingu Úkraínu.
Breskar leyniþjónustustofnanir segja að Rússar reyni að grafa undan úkraínskum stjórnvöldum með því að setja strengjabrúður sínar í embætti borgar- og bæjarstjóra í Úkraínu og með því að auðvelda Úkraínumönnum að fá rússneskan ríkisborgararétt.
