Agnes M. Sigurðardóttir, biskup Íslands, segir að mat frekar en óhagganlegar reglur ráði för hvað varðar fyrirhugaðar fjöldabrottvísanir hælisleitenda og flóttafólks frá landinu. Hún gagnrýnir áform stjórnvalda og segir að þær fordæmalausu brottvísanir, sem eru fram undan, stríði gegn kristnum gildum.

Fréttablaðið skýrir frá þessu í dag. „Við viljum fara eftir lögum og reglum en við viljum að reglur séu túlkaðar á mannúðlegan hátt en ekki eins strangt og hægt er,“ er haft eftir Agnesi sem sagði afleitt að til standi að vísa fólki úr landi sem hafi komið sér fyrir hér og skotið rótum. „Það virðist matskennt hvort fólki sé vísað úr landi eða ekki,“ sagði hún.

Hún sagðist telja að langflestir prestar landsins harmi brottvísanirnar og bendir á að við séum kristnar manneskjur og okkur beri að aðstoða fólk á flótta.

Á laugardaginn verður fyrirhuguðum brottvísunum mótmælt á Austurvelli og munu hælisleitendurnir sjálfir hafa orðið en fyrirhugað er að vísa um 300 hælisleitendum úr landi.