Ingveldur Sæmundsdóttir, aðstoðarmaður Sigurðar Inga Jóhannssonar, innviðaráðherra, segir í skriflegri yfirlýsingu til RÚV að hún hafi ekki logið þegar hún fullyrti í samtali við DV í gær að ráðherrann hefði ekki látið rasísk ummæli falla á gleðskap í tilefni af Búnaðarþingi í síðustu viku. Eins og DV greindi frá á sunnudaginn á Sigurður Ingi að hafa vísað til Vigdísar Häsler, framkvæmdastjóra Bændasamtakanna, sem „hinar svörtu.“

„Þetta er algjört bull,“ sagði Ingveldur í samtali við DV. Þá fullyrti hún að hún hefði ekki neytt áfengis þetta kvöld og staðið við hlið Sigurðar Inga þegar hin umdeildu ummæli voru látin falla.

Í dag birti Vigdís Häsler svo yfirlýsingu þar sem hún staðfesti formlega að Sigurðu Ingi hefði látið særandi ummæli falla og að aðstoðarmaður hans, Ingveldur, hafi ekki verið viðstödd atvikið og það hafi verið særandi að reynt hafi verið  að gera lítið úr hennar upplifun.

Nokkru síðar sendi Sigurður Ingi frá sér yfirlýsingu þar sem hann gekkst við því að hafa látið óviðurkvæmileg orð falla og baðst afsökunar á þeim.

Þess ber að geta að Ingveldur svaraði ekki fyrirspurn DV þar sem leitað var eftir frekari skýringum á orðum hennar. Þess í stað svaraði hún fyrirspurn RÚV skriflega. „Í svari mínu til DV í gær var ég segja frá því sem ég heyrði og varð vitni að og var það ekki borið undir ráðherra,“ hefur fréttastofa RÚV eftir Ingveldi.