„Bakland Pútíns útilokar ekki að hann muni tapa stríðinu, missa völdin og því verði að flytja hann strax á brott.“ Þetta skrifaði Abbas Gallyamov, fyrrum ræðuskrifari Vladímír Pútíns, Rússlandsforseta, á Telegram.

Segir Gallyamov að áætlunin um flótta Pútíns frá Rússlandi nefnist „Örkin hans Nóa“ og að eins og nafnið bendi til þá snúist hún um að hann fari til annars lands ef það verður of óþægilegt fyrir hann að vera í Rússlandi. Daily Beast skýrir frá þessu.

Hann segir að upphaflega hafi Kína verið áfangastaðurinn en fallið hafi verið frá því vegna óvissu um samstarfsvilja Kínverja.

Þess í stað eru Suður-Ameríka og þá aðallega Venesúela efst á lista Pútíns yfir hugsanlega áfangastaði ef hann neyðist til að flýja land.

Igor Sechin, forstjóri Rosneft orkurisans og náinn vinur Pútíns er sagður vera einn af aðalmönnunum á bak við þessa flóttaáætlun. Er aðstoðarmaður Sechin sagður vera í Venesúela til að undirbúa hugsanlega komu Pútíns.

Daily Beast segir að á Telegram-rásinni Mozhem Obyasnit hafi einnig verið fjallað um svipaðar flóttaáætlanir Pútíns á grunni heimilda úr innsta hring í Kreml og hjá Rosneft. Eru háttsettir embættismenn sagðir vera að kaupa landrými í Venesúela.

Ekvador, Argentína og Paragvæ eru einnig sögð koma til greina sem áfangastaður.