Mark Schwartzman, ritstjóri skólablaðsins The Bobcat Prowl í South Windsor High School, tók að sér ansi stórt verkefni í sumar. Hann ákvað að skrifa bréf til allra þjóðarleiðtoga heimsins fyrir hönd skólablaðsins. Í bréfunum spurði hann alla leiðtogana að sömu spurningunni: Hvað viljiði að ungt fólk í Bandaríkjunum viti um þitt land?
Schwartzman segist hafa fengið innblástur fyrir þetta verkefni frá þrá sinni um að starfa sem diplómati í framtíðinni.
„Ég hugsaði einfaldlega að ef ég byrja að mynda tengingar við mikilvægt fólk nógu snemma þá gæti ég fengið draumastarfið mitt. Ég var hins vegar ekki búinn að sjá fyrir mér hversu mikið heimsmyndin mín átti eftir að stækka og hversu mikið ég átti eftir að læra,“ segir ritstjórinn í greininni sem hann skrifaði í skólablaðið.
Schwartzman útskýrir næst hvernig hann tók saman öll heimilisföng, nöfn og titla hjá öllum 196 þjóðarleiðtogum heimsins. Heimilisföng 10 af þessum þjóðarleiðtogum gat hann þó hvergi fundið svo bréfin sem hann skrifaði voru alls 186 talsins. Þegar hann hafði lokið við að skrifa 186 bréf, stíluð á næstum alla þjóðarleiðtoga heimsins, sendi hann þau með pósti.
„Þá kom erfiðasti hlutinn… biðin.“
Eftir að Schwartzman hafði beðið vikum saman byrjuðu fyrstu svarbréfin að skila sér. „Hér fyrir neðan eru bara nokkur af fyrstu svörunum sem ég fékk,“ segir hann í greininni og birtir bréfin frá þeim þjóðarleiðtogum sem voru fyrstir að svara. Á meðal þeirra er enginn annar en Guðni Th. Jóhannesson, forseti Íslands.
„Þegar sumrinu fór að ljúka fékk ég handskrifað bréf frá forseta Íslands,“ segir Schwartzman sem birtir svarið frá Guðna.
„Það eru svo margir hlutir sem ég vil að unga fólkið í Bandaríkjunum viti um landið mitt. Er eitthvað eitt mikilvægara en allt hitt? Ég veit það ekki en ég myndi bara hvetja þig og aðra í Bandaríkjunum til þess að vera forvitin, halda huganum opnum, vera viljug og áköf í að læra um annað fólk, ferðast og hitta aðra. Svo komdu og heimsóttu okkur ef þú getur!“ skrifar Guðni í bréfinu.
Schwartzman segir að Guðni hafi einnig skrifað persónuleg skilaboð til sín þar sem hann fer yfir tengslin sem eru á milli South Windsor og Íslands. „Eitt af dæmunum sem hann útskýrði er að trommarinn í hljómsveitinni Toto hafi verið frá South Windsor og að íslensk söngkona hafi lengi spilað með þeim, hann sagði þetta sýna hversu tengdir tveir mismunandi staðir eru í raun og veru.“
