Nýlega náðu úkraínskar hersveitir Izium á sitt vald en rússneskar hersveitir höfðu haft borgina á sínu valdi í tæplega sjö mánuði. Fréttamenn AP fengu nýlega aðgang að tíu pyntingarklefum í borginni sem Rússar eru sagðir hafa notað.

Einn klefanna er stór hola í íbúðahverfi, sól skín aldrei ofan í hana. Einnig var um stórt neðanjarðarfangelsi að ræða sem lyktaði af þvagi og úldnum mat.

Fréttamennirnir sáu einnig heilsugæslustöð, lögreglustöð og leikskóla þar sem Rússar eru sagðir hafa stundað pyntingar.

Fréttamenn AP hafa staðfest að átta manns, þar af sjö óbreyttir borgarar, hafi látist af völdum pyntinga Rússa.

Fréttastofan segir einnig að af þeim 447 líkum sem fundust í fjöldagröfum utan við borgina hafi 30 borið greinileg merki pyntinga.